E festival di cine di Playa a cera su di seis edicion cu entregamento di premio. Miho pelicula cortico internacional a bay pa Francia cu e pelicula di ficcion The Brittle Little Ones. E pelicula aki tabata parti di e competencia di peliculanan online cu a ricibi votonan di pulico. Un otro ganador di e presentacionnan online tabata e documentario cortico Mision Brio dirigi pa Ephrayim Odor.
E School Short Story di e aña aki a bay pa Maria College Mavo cu nan storia di Hooiberg. E Kingdom of Short premio publico a wordo gana door di Hobi, un pelicula cortico di ficcion dirigi pa Aramis Garcia Gonzalez. E premio di hurado pa Kingdom of Shorts a bira Fort Buku di Loëlle Monsanto. E anochi di ceremonia a culmina cu e entregamento di e premio Ola di Grandeza, un premio cu ta reconoce e dedicacion y ta duna honor na esnan cu a causa un impacto cultural y a contribui na e desaroyo di un industria di cine local. Rebecca Roos a ricibi e premio pa su 30 aña di contribuicion na Aruba su identidad riba e tereno di documentario y cinematografico.
Inscripcion pa consideracion pa participa na Playa Film Festival 2027 a habri. Pa e di siete edicion e competencia online cu votacion di publico lo accepta pelicula te cu 5 aña bieu. Peliculanan cu a wordo presenta publicamente, pero nunca a wordo pasa na Playa tambe ta eligibel.
Na 2027, fundacion CINEARUBA ta celebrando 10 aña desde a inicia cu presentacionnan den aire libre. Otro aña ta bay tin presentacionnan gratis pa publico den caya grandi na Playa y den barionan. Pa e presentacionnan aki ta busca peliculanan di comedia of di famia no mas bieu cu 2 aña y cu no a wordo presenta na Playa Film Festival ainda. E Kingdom of Short cu premio hurado y publico lo ta bek y ta acepta peliculanan no mas bieu cu 2 aña cu no a wordo presenta publicamente na Aruba ainda. Pa aplica por bishita https://filmfreeway.com/playafilmfestival cu ta e unico plataforma cu por inscribi peliculanan.
