Dia 27 di augustus, e team cientifico y e ekipo a subi e boto di investigacion R/V Hydra, maneha pa Inkfish, un organisacion filantropico dedica na amplia conocemento cientifico di lama door di investigacion. Hunto cu nan ta Arubianonan Harold Kelly, arkeologo di Museo Arqueologico Nacional Aruba y Oriana Wouters, ecologo di IDNOVA.
R/V Hydra ta un plataforma flotador cientifico cu ta carga un ekipo multidisciplinario di aproximadamente 48 miembro: cientifico, tecnico, y specialista. Lider di e expedicion Matt Carter y e ekipo tin experticio cu ta cubri ciencia marino, investigacion geospacial, sambuyamento tecnico, y otro disciplinanan cientifico.
E miembronan Arubiano di e ekipo y nan insititucion ta sostene Inkfish cu conocemento local, literatura, y perspectivanan tocante e sitionan, yudando asina e ekipo di Inkfish pa tuma decisionnan ora di planea sondeo y sambuyamento. Cartografia a demostra algun anomalia, e ekipo di Inkfish ta desaroya interpretacionnan posibel basa riba data, mientras informacion cu e ekipo Arubano a provee a yuda verifica varios di e teorianan aki. Simultaneamente, e ekipo Arubano ta siña di e ekipo di e laboratorio, hayando conocemento practico di colecta y prepara muestranan di ‘environmental DNA’ (eDNA). E intercambio aki entre experticio tecnico y conocemento local ya a demostra di ta valioso.
Hydra a traha mapa di areanan cerca y leu di costa west di Aruba. Un di e resultadonan mas excitante ta cu den solamente 4 dia, R/V Hydra a detecta leu di costa barconan cu a sink asocia cu sitionan conoci como tambe sitionan anteriormente no identifica. Mientrastanto, e boto di investigacion Skye a ser desplega pa areanan cerca di Aruba su costa na banda Zuid.
Despues di dos sambuyamento di test na e sitionan Jane Sea y avionnan Arashi, e ekipo a sondea e sitio di Antilla. Akinan a colecta imagen uzando scooternan bou awa ekipa cu camera, hunto cu muestranan di awa pa analisa eDNA, pa provee conocemento di pisca y biodiversidad di invertebrados, y tambe di e presencia di patogenas asocia cu rif.
Durante e prome anochi, a traha un modelo virtual 3D di ES Antilla. Mientrastanto, R/V Hydra a continua pa traha mapa leu di costa, permitiendo e ekipo pa evalua e modelo liher, identifica unda falta informacion den e imagennan y determina si mester organisa un sambuyamento mas pa cubri esaki y pa haci evaluacionnan ecologico, incluyendo observacionnan di e estado di deterioriacion di ES Antilla.
Durante e siguiente dos simannan, e ekipo di Inkfish y e botonan di investigacion lo continua pa traha hunto cu Museo Arqueologico Nacional Aruba (MANA) pa explora, identifica y documenta Aruba su Herencia Cultural Bou Awa, ampliando loke nos sa relaciona cu e paisahe y storianan bou di nos awanan teritorial.
