Oranjestad: Diasabra for di oranan trempan di anochi, un cantidad di hoben tabata hangout den area di Seaport Mall cu Wilhelmina Park, nan tabata haci desordo, causando molester na otro bishitantenan di Seaport Mall.

Supuestamente e hobennan aki lo ta bay Seaport Mall pa mira pelicula, pero tin hopi cu no ta ni bay mira pelicula, pero ta keda hangout eybanda. Otro cu ta bay mira pelicula, pero ora e pelicula caba nan no ta bay cas. E aglomeracion di e hobennan den e area turistico aki ta causa molester na local y turistanan cu ta bishita Seaport Mall.

Na varios ocasion den weekendnan, polis mester bay atende cu e hobennan aki, esaki pa hopi tempo caba ta mescos. Den pasado peleanan di hobennan a yega di bay for di man, cu casonan di hincamento y maltrato. Pa evita esaki sosode un biaha mas, polis ta bay eybanda pa mantene ordo.

Diasabra anochi, un persona lo a mira un gang di hoben cu lo a cuminsa bringa cerca di caminda y mesora e la bati alarma. Na momento cu e hobennan a mira e patruya di polis yega, nan a sali na careda, bou gritamento, drenta Wilhelmina Park. Polis a bay nan tras y a pidinan pa cuminsa move for di e sitio.

Tambe pa nan siguridad y di otro, e agentenan policial a rista varios di e hobennan aki, cu tabata tin un tas cu nan. Esaki pa mira si acaso nan por tin un arma, droga of cualke otro cosnan prohibi den nan poder. Despues cu polis a core cu e hobennan for di banda di Seaport Mall, un gang grandi di hoben a bay sinta na e estatua di Wilhelmina.

Poco poco nan a cuminsa bay for di e sitio, polis a keda tira bista. Na momento cu mayoria di e hobennan aki a bay for di eybanda y e situacion a calma, e polisnan a sigui cu nan patruya.

LEAVE A REPLY

Please enter your comment!
Please enter your name here