Hopi cu ta yega na Crisis Team a expresa nan disgusto con cierto gruponan ta comporta nan mes mientras cu tin medida y leynan vigente pa salvaguardia e interesnan di nos pais den e pandemia ocasiona pa Covid-19. Pero di otro banda hopi ta bisa cu Crisis Team no ta hasi control of cu no ta tende nada di e castigonan ora cu KPA traha proces verbal. Cu otro palabra
den comunidad y den e propio seno di Crisis Team tin e asina yama “Woedeporno” cu ta tumando lugar.
Kico ta “Woedeporno” y con e ta wordo ocasiona pa Ministerio Publico:
“Woedeporno” ta ora cu informacionan ta sali ta crea indignacion of rabia mientras di otro banda tambe ta bin indignacion of rabia paso a expresa indignacion of rabia contra nan y asina e circulo vicioso ta sigi. Hopi biaha e origen di tur esaki ta wordo lubida.
E origen di e “woedeporno” aki na Aruba ta paso Ministerio Publico no ta hasi nan trabao y ta crea escalacion di casonan activo. Esaki ta crea disgusto, inconveniencia y rabia cerca tur hende, grupo of instancianan incluyendo Gobierno y Crisis Team. Dus nos no mester bay busca mas leu paso tur cos ta sinta cerca Ministerio Publico y niun caminda mas!
Reclamo contra Gobierno y Crisis Team:
Por sinti un desapunto total den nos comunidad contra esnan cu ta viola e medidanan y leynan temporal ya cu nan no ta hanja castigo. Por lesa y scucha tur dia e reclamonan cu ta bai direcion di gobierno y Crisis Team especialmente ora cu tin conferencianan di prensa. Por ripara mesora e euphoria, rabia y desapunto den comunidad cu ta reclama cu no ta actua cu man duro contra
esnan cu ta viola e medida- y leynan pa cual esnan cu si ta cumpli tin cu carga e consecuencia.
Den HORECA e disgusto ta mas grandi ainda ya cu nan sigur ta esnan cu mas ta keda afecta cu e tiki turistanan cu ta jegando Aruba. E danjo pa pais Aruba ta grandi y e peso financiero ta cay den scochi di gobierno cu ta pagando FASE, Loonsubsidie y di otro banda hopi hende ta perdiendo nan trabao. Tur esaki ta danki na e “winterslaap” cu Ministerio Publico ta aden.
Fiscalnan cu no ta hasiendo nada, absolutamente nada pa hiba casonan sea TOM zitting of Corte
Status di Ministerio Publico:
Ministerio Publico tin e monopolio den persecucion di un sospechoso ora cu e viola nos leynan penal vigente. Esaki mester bai segun e Codigo di Procedimiento Penal (Wetboek van Strafvordering Aruba). E Codigo aki ta mara na principionan den cual tin e principio di Legalidad. E principio di Legalidad ta ensera cu ningun sospechoso por wordo persigi y sentencia si no ta existi un ley/ordenansa cu ta stipula e manera y ta mensiona e hecho pa cual OM kier prosesa un sospechoso…. PEROOOO e principio ta ENSERA TAMBE CU OM MESTER PERSIGI TUR SOSPECHOSO DI UN HECHO PENAL CONTAL CU TA EXISTI E POSIBILIDAD CU E LO POR LOGRA UN CONDENA.
Ministerio Publico ta parti di e “Rechtelijke Macht”(Poder di Jueznan) y nan tin e rol di ta e “Staande Magistratuur” pa cual Gobierno of Parlamento (Uitvoerende- en Wetgevende Macht) no por bisa nan ken nan tin cu persigi. Tampoco por bisa cuanto castigo mester wordo impone.
Esaki ta respeta e asina jama Trias Politica cu ta e weso di lomba di nos Estado y nos Constitucion. Pero si mester corda cu e Minister di Justicia ta y lo keda esun politicamente responsabel pa Ministerio Publico.
Ministerio Publico por a evita escalacion di contagio si a traha drechi:
Nos ta a hasi 12 luna caba den e crisis aki y simplemente ta parse cu violacion di e medidanan y leynan ta un “new trend” ya cu ningun hende ta wordo castiga toch. Esnan cu ta viola e medida- y leynan ta sigi hasie y otronan cu si tawata obedece e medida- y leynan a disgusta y hopi di nan ya ta hasi mescos cu tur otro sin importa kico por ta vigente como medida of como ley. Tur esaki ta danki na e forma irresponsabel con Ministerio Publico ta neglisha su responsabilidadnan. Ta parse cu den Ministerio Publico lo no tin capacidad of boluntad pa duna nan parti pa asina cuminsa na castiga tur cu a hanja un proces verbal di polis of di controle team
di Crisis Team. Si Ministerio Publico a y ta hasi su trabao na un manera drechi sigur awe Aruba lo no ta mal para pa loke ta e cifranan di casonan active. Hendenan lo tawata mucho mas conciente cu tin castigo y sigur lo mantene nan mes na tur ley y medidanan vigente. Pero si nan no ta hanja e senjal di aviso aki mas cu claro fiestnan lo sigi, aglomeracionan lo sigi y tur otro
forma di actuacionan irresponsabel lo sigi.
Hopi miembro di KPA disgusta cu Ministerio Publico:
Nos a combersa cu masha hopi miembro di KPA y sigur nan a expresa nan disgusto y desapunto total den e forma di proceder di Ministerio Publico. Nan ta di opinion cu nan ta cargando awa hiba lama paso apesar cu nan ta traha proces verbal y ta hasi nan trabao “naar eer en geweten” toch tur cos ta keda para acumula na Ministerio Publico sin ser finalisa manera cu e Codigo di
Procedimiento Penal ta stipula. Ningun hende ta bai TOM zitting y no tin caso cu a yega Corte.
Lik op Stuk a resulta un fracaso total y lo mas peor ta cu hendenan cu a wordo atendi pa polisnan a hanja cierto forza ya cu ora cu polis actua nan ta duna resistencia usando e pretexto cu Ministerio Publico mes no ta di acuerdo cu e medida- y leynan y hasta cu Ministerio Publico mes a hiba Gobierno/Crisis Team corte paso e di dos toque de queda lo tawata illegal.
Crisis Team den Crisis:
Den Crisis Team mes tin un “Crisis” ya cu varios miembro lo a cuestiona e representante di Ministerio Publico cu ta den Crisis Team. Nos por bisa cu tur claridad cu e disgusto ta grandi ya cu segun nos a compronde cu tin un Fiscal cu a caba di bin di Boneiro y ta kere cu su no ta necesario pa persigi ningun hende si e no ta un recidivista. Esaki mas cu logico ta un violacion serio di e Principio di Legalidad y ta parse cu e monopolio di persecucion penal ta wordo malusa pa Ministerio Publico.
Ley di Openbaarheid van Bestuur mester wordo treci den practica:
Den nos Ordenansa cu ta hiba e nomber: Wet OpenbaarheidLandsverordening openbaarheid van bestuur tur hende (een ieder) por pidi pa un of otro documento y of informacion di Gobierno y of di instancianan cu ta cai bow di Gobierno siempre y cuando cu esaki no ta bai den conflicto di e Seguridad Nacional di Pais Aruba.
Segun e WOB ta para claramente:
HOOFDSTUK 2 Openbaarmaking op verzoek Artikel 2 1. Een ieder kan de Minister schriftelijk verzoeken om informatie, neergelegd in documenten. 2. De minister, belast met administratieve zaken kan nadere regels stellen omtrent de wijze van indiening van
verzoeken om informatie alsmede omtrent de wijze waarop de informatie verstrekt wordt. Cu e Capitulo y articulonan aki tur hende (een ieder) por hasi e peticion na e Minister responsabel pa e asuntonan administrativo cu den e caso aki ta e Promer Minister/ Minister di Asuntonan General y Administrativo pa presenta y of hasi publico documentonan cu ta regarda e trabaonan di Ministerio Publico pa ta mas specifico resumen y of resultadonan di nan persecucionan relaciona cu violacion di e medida- y of leynan pa loke ta Covid-19 y tambe e Lik Op Stuk cu te awe ningun hende no sa net nada di esaki.
E unico conclusion:
Considerando tur esaki y e realidad di loke nos a bin ta tuma nota di dije mas cu claro por conclui cu e unico responsabel pa e escalacion di casonan positivo ta y lo keda Ministerio Publico y nos ta spera di curazon cu Ministerio Publico tin e curashi y weso di lomba pa jama un conferencia di prensa unda cu nan mester bai rindi cuenta di kico na a hasi exactamente den e ultimo 12 lunanan y pakico nan no a termina e proceso di persecucion na e cantidad grandi di hendenan cu a hanja un procesverbal. Bala ta den tereno di MInisterio Publico paso e rosea di pueblo y tur esnan afecta pa e forma descabeya e irresposabel ta riba lomba di cada un di e fiscalnan sinta den e edificio na Rumbastraat.
