Durante e rueda di prensa semanal di fraccion di PPA, parlamentario Eduard Pieters a expresa un critica fuerte y profundo riba e maneho inconsistente di minister Gerlien Croes durante e reunion parlamentario di dialuna ultimo. E reunion aki tabata relaciona cu e desviacion di ley di comptabilidad den destaho publico pa material educativo na Papiamento y Hulandes como idioma stranhero.
Pero pa Pieters, e problema real no tabata e desviacion di ‘compatibiliteitsverordening’ mes. E problema real tabata loke e reunion a revela: un ministerio cu, segun Pieters, ta move sin direccion cla, ta desconecta di su propio historia educativo y ta sigui core tras di e excusanan, mientras enseñansa ta keda atras.
“Mi ta compronde e proceso, pero no malinforma pueblo”
Como profesional di enseñansa Pieters a laga sa bon cla, cu e ta compronde, cu no ta facil pa haya e companianan cu por produci y distribui material educativo, specificamente pa Papiamento y Hulandes como idioma stranhero.
“Precisamente paso e mercado ta limita, bo tin cu ta extra transparente,” Pieters a enfatisa.
Segun Pieters, si minister ta scoge pa desvia for di e ‘compatibiliteitsverordening’, e tin derecho pa hacie como excepcion, pero e tin obligacion tambe pa responsabilisa su mes cu argumentacion serio, documentacion y prueba concreto na Parlamento.
Sinembargo, durante su presentacion, minister a haci e declaracionnan cu, segun Pieters, simplemente “no ta cuadra”.
E vacaturanan no ta destaho publico
Un di e puntonan cu a crea mas preocupacion tabata ora minister a relaciona e vacaturanan cu e asunto di destaho publico. Pieters a bisa cu e mes a bay verifica riba website oficial di Departamento di Enseñansa (DEA) y cu e vacaturanan menciona no ta cay bou di destaho publico.
“Vacaturanan ta trata posicionnan den DEA cu ta cay bou di LMA, pues hendenan cu ta drenta den “tijdelijke dienst” y despues “vaste dienst”. Esaki no tin nada di haber cu destaho publico,” Pieters a declara.
Segun Pieters, aki tin solamente dos posibilidad: of minister a haci un fout grave den su splicacion of e no ta domina e materia cu e ta discutiendo. “Y den tur dos caso, pueblo ta esun cu ta keda malinforma,” Pieters a conclui.
“No bisa cu no tin vision. Abo no ta ehecutando loke tin.”
Pero e critica mas duro di Pieters tabata riba e declaracion di minister, cu enseñansa no tin un vision y mision suficientemente defini. Pa Pieters, esaki ta un declaracion extremadamente serio y historicamente incorecto. “E campo di enseñansa a formula vision y mision desde decadanan pasa,” el a enfatisa, mencionando documento y trayecto nacional manera: SHO Nota di 1988 caminda cu despues a sali proyecto y manehonan manera Stuurgroep Herstructurering Avondonderwijs (SHA), PRIEPEB, Nationaal Onderwijsplan (NOP) y finalmente Plan Educacion Nacional (PEN) 2030 cu ainds ta den proceso di implementacion.
Tur esakinan, segun Pieters, tabata crea hunto cu docente, directivanan, muchanan, studiantenan, stakeholdernan, gremionan y e profesionalnan di enseñansa, mayornan, etc.
“Problema di enseñansa na Aruba no ta pa falta di vision. Problema di enseñansa na Aruba ta pa falta di curashi politico pa ehecuta loke tin caba cla riba papel traha pa expertonan den enseñansa” el a declara.
20 aña di atraso y ainda gobierno ta busca excusa
Pieters a critica fuertemente cu minister ainda ta papia cu e leynan no ta cla “mester preparacion”, mientras hopi di e documentonan y e reformanan ta cla caba cu ta forma parti di e preparacion.
“Te hasta tin leynan ta cla caba. E documentonan ta cla. E reformanan ta identifica desde tempo di ‘doorlichtingsrapport’ y hasta UNICEF cu a adverti Aruba desde 2013 cu innovacion grandi tabata urgente,” Pieters a recorda.
Segun Pieters, beroepsonderwijs, toezicht educativo y modernisacion di enseñansa a keda tranca pa mas cu 20 aña door di falta di decision politico y falta di liderazgo.
“Si problema ta DWJZ, solucion’e. Si mester busca experto for di Hulanda, hacie. Pero stop cu excusa barata y stop di hunga heroe,” Pieters a bisa contundentemente.
“Enseñansa no ta campaña politico”
Den un tono fuerte, Pieters a adverti cu enseñansa no por sigui ta trata como un instrumento politico of un tema secundario.
“Enseñansa ta defini futuro di un pais,” el a enfatisa. “Y ora gobierno ta sigui perde tempo door di falta di liderazgo y curashi, no ta politico ta paga e prijs, sino nos muchanan, nos maestronan y nos futuro generacion.”
