For di algun siman pasa SOLO DI PUEBLO ta siguiendo un desaroyo entre Stichting Musica y SMAC, unda entre e dos fundacionnan aki tin un problema di placa.

E confirmacion a drenta cu e problema ta sinta pa un suma di 25 mil florin cu Smac por medio di su presidente Daren Van Ommeren ta exigi di Musica, indicando cu Musica mester paga SMAC.

Di otro banda Stichting Musica a nenga rotundamente di paga 25 mil y a ta para riba e desicion definitivo cu Musica no ta paga SMAC 25 mil florin.

Arma di presion a cay na awa?

Pa hopi aña e organisacionnan di Carnaval tabata tin un convenio cu Gobierno, cu tur evento carnavaleso, mester pasa via SMAC, ( anteriormente SAC) pa un aprobacion, enbvista cu SMAC lo ta e “alegemene vergunning houder” pa eventonan di carnaval.

Cu e poder aki, SMAC ( y SAC) tabata por a exigi loke cu nan desea, pasobra sin nan, lo no tin permiso pa evento carnavalesco.

Ta parce cu e aña aki, e situacion a dal un buelta, ora cu Gobierno a bay over na otroga Musica e permiso directamente, sin pasa via SMAC y sin previo aprobacion di SMAC. Pues, e arma principal di SMAC awor parce cu a cay na awa, pasobra Stichting Musica no a perde oportunidad di te hasta a saca potret na warda di polis, indicando cu nan a haya permiso.

Ta desaroyonan di cambio, cu loke no tabata por antes, awor si ta posibel.

Antes nos ta corda cu presidente di SAC, Sr. Milo Croes a bisa cu nan a crea e festivalnan aki pa asina haya fondo pa draai carnaval. Den tempo di Milo Croes (dfm), ta SAC so tin permiso y tur hende cu kier organisa algo, mester acudi na SAC pa djey bay polis. E poder aki tabata pa garantisa cu tin un carnaval bon organisa y un fundacion cu ta monitor tur fecha, etc. etc.

Parce cu e poder aki awor a cay na awa y cu ya no ta manera antes, pues tur organisacion no mester acudi mas na SMAC, pasobra SMAC no ta disponde di e mes poder di antes cu SAC tabatin, o sea cu Gobierno no ta sigui cu e acuerdo aki.

Cu e permiso den man, Stichting Musica ta sinti cu nan no mester duna ningun hende placa y tampoco SMAC por exigi 25 mil, di cual ya caba nan a dicidi cu nan lo no bay paga SMAC 25 mil, lagando SMAC lomba contra muraya, pasobra SMAC no ta vergunning houder mas di e festival. Asina tambe Carnaval ta perde un fuente di recauda fondo pa draai carnaval.

Ta intresante pa mira ta kico lo bini afor di e pelea aki entre SMAC y MUSICA. Di otro banda MUSICA a anuncia di lo cuminza bende nan ticketnan y lo sigui trankilamente cu nan organisacion di festival.

LEAVE A REPLY

Please enter your comment!
Please enter your name here