Prome Minister riba invitacion di Parlamento di Aruba a duna splicacion di e situacion actualmente cu Hulanda, principalmente riba e rol di Parlamento den esaki. Ta trata di e pagamento di 5% bek na empleadonan publico y tur esnan cu ta traha na fundacionnan cu ta wordo subsidia pa Gobierno.
Manera cu ta conoci, un di e condicionnan cu Hulanda a pone pa Gobierno di Aruba por paga e 5% di salario bek na empleadonan publico ta, cu mester pasa e ley Landsverordening Normering Topinkomens (Wever-Croes norm). E ley aki ta pone un maximo na salario di directornan di semi publico. Gobierno a entrega e ley aki manera cu Hulanda a pidi pa entrega esaki, y asina cu Parlamento a aprobe, a pubic’e tambe y e lo drenta den ehecucion dia 1 di augustus 2022.
Sinembargo, Parlamento, haciendo uzo di su derecho constitucional di entrega amienda, a haci cierto cambio na e ley. Prome Minister a splica cu durante di reunionnan cu Secretario di Estado sra. Alexandra van Huffelen, sra. Van Huffelen a indica cu e cambionan aki ta desvia di loke Conseho di Minister di Reino a bisa. Premier Wever – Croes na su turno a splica Secretario di Estado van Huffelen cu Parlamento ta un entidad autonomo cu Gobierno di Aruba tampoco Gobierno di Hulanda of di Reino por duna un instruccion na dje.
Tin division di poder “scheiding der machten”, Parlamento ta un y Gobierno ta un. Consecuentemente, Gobierno no por bisa Parlamento kico pa haci y kico no pa haci. Sigur no si ta trata di su derecho fundamental di trece amienda den leynan.
Mescos cu na Hulanda, ni Van Huffelen, ni ningun otro Minister ta duna instruccion na Tweede Kammer. “P’esey ta cuestiona e pensamento di Hulanda cu ta implica cu aki na Aruba esey si lo por”, Prome Minister Wever – Croes a agrega.
Na final di e reunion cu Van Huffelen, Prome Minister Wever – Croes a pidi e Secretario di Estado pa pone e informacion aki riba papel pa por manda esaki Parlamento. “Como hurista mi sa kico ta mi rol como Gobierno, y mi no ta bay den e area di duna instruccion na Parlamento,” Prome Minister a accentua.
Concluyendo, Premier Wever – Croes a bisa cu Parlamento a keda preocupa cu e anuncio aki p’esey a duna Parlamento mas informacion tocante status di e situacion. Indudablemente Parlamento lo desea informacion tambe tocante di e conseho pa aanwijzing y situacion financiero di Pais Aruba, pues Premier Wever – Croes lo percura pa duna Parlamento tur informacion den cuadro di transparencia.
