Den cuadro di e preparacion pa Dia pa Cuida Aruba di 25 di juli, Prome Minister Mike Eman a bishita tres iglesia Cristian pa comparti e mensahe tras di e iniciativa nacional. Durante su bishitanan na Good Samaritan Church na Dakota, Iglesia Maranatha na Madiki y Peniel Baptist Church na Sta. Cruz, e Prome Minister a enfatisa cu e accion ta hopi mas cu un campaña di limpieza. E ta un yamada pa fortalece responsabilidad comparti, sentido comunitario y compromiso pa cuida e isla cu Dios a pone den nos man.
Good Samaritan Church
Na Good Samaritan Church, Mike Eman a invita e congregacion pa participa activamente den e accion nacional di 25 di juli. El a reconoce cu, despues cu e dump a cera, Aruba ta confrontando un reto grandi cu maneho di sushi. Tambe el a expresa su deseo pa recupera e tradicion di antes, ora e famianan tabata uni pa haci nan cas limpi, bario y e diferente luga cu nos tur ta comparti. Segun e Prome Minister, limpieza fisico ta solamente un parti di e mensahe. E accion ta representa un compromiso pa cuida otro, fortalece comunidad y cumpli cu e responsabilidad cu Dios a duna nos pa cuida e tera cu El a bendiciona nos cun’e. El a invita e congregacion pa scoge un luga den nan bario y uni den e esfuerso colectivo pa un Aruba mas limpi. Durante e mainta, Pastoor Frank Daal a hiba e congregacion den oracion, pidiendo bendicion di Dios riba e iniciativa Cuida Aruba. Basando riba e relato di Genesis, el a recorda cu Dios a duna hende e responsabilidad pa cuida y mehora loke El a pone den nos man. Pastoor Daal a pidi mas sabiduria, salud y vision pa Prome Minister Mike Eman, su esposa y henter Gobierno den nan servicio na pueblo. Tambe el a ora pa e iniciativa por uni Aruba den un forma special, inspira e iglesianan y comunidad pa traha hunto y laga nos isla bira un ehempel pa otro nacion.
Iglesia Maranatha
Despues, e Prome Minister a bishita Iglesia Maranatha na Madiki, unda Pastoor Luis Bueno y miembronan di e congregacion a ricibi’e. Durante su palabra, Mike Eman tambe a comparti cu Cuida Aruba ta un yamada pa cada ciudadano pensa riba e responsabilidad cu nos tur tin pa contribui na bienestar di otro y cuida Aruba pa e generacionnan cu ta bin. El a indica cu, aunke limpieza fisico di nos isla ta importante, e proposito di e iniciativa ta hopi mas profundo. Cada persona por haci su parti, sea haci nan cas limpi, su bario, un cancha deportivo, un iglesia of otro luga den comunidad. E cambio cu Aruba mester solamente por logra ora nos tur pone man hunto. E Prome Minister a invita e congregacion pa participa activamente den Dia pa Cuida Aruba, resaltando cu cada persona, famia, iglesia y organisacion por aporta den su propio manera pa fortalece sentido comunitario y cuida nos isla. Durante e encuentro, Pastoor Luis Bueno a comparti e preocupacion di e iglesia tocante un pida tereno patras di nan edificio, unda cu frecuencia hende ta tira sushi, bestia morto y otro tipo di desperdicio. El a indica cu e congregacion ta comprometi pa mantene e area aki limpi y kier haya e permiso necesario pa haci y mantene e area completamente limpi y converti esaki den un parkeerplaats. Esaki lo yuda caba cu e problema di sushi den e bisindario.
Peniel Baptist Church
E ultimo bishita di e dia tabata na Peniel Baptist Church, unda Prome Minister Mike Eman a continua comparti e mensahe di responsabilidad comparti y compromiso cu nos comunidad. Pastoor Cedric Charles a gradici Prome Minister Mike Eman pa e esfuerso relaciona cu e iniciativa Cuida Aruba. El a confirma cu e congregacion lo sigui haci su parti y a anima e miembronan pa uza e diferente facilidad disponiblel pa benta sushi den e luga corecto. Cu gracia di Dios, e iglesia lo continua cumpli cu su responsabilidad den comunidad. Durante e bishita, Robert Candelaria, Secretario General di Ministerio di Asunto General, a comparti cu e iniciativa ta den liña cu e palabra di Dios. El a enfatisa cu nos tin e responsabilidad pa cuida e tera cu Dios a bendiciona nos cun’e.
Dia pa Cuida Aruba
Dia pa Cuida Aruba lo tuma luga dia 25 di juli, cuminsando den oranan di mainta. E iniciativa ta invita tur ciudadano, famia, iglesia, scol, empresa, club deportivo y organisacion pa scoge un luga y haci nan parti. Esaki por ta dilanti di cas, den e caya, den bario, banda di un iglesia, un club of un otro luga cu comunidad ta comparti.
Mas cu un accion di limpieza, Dia pa Cuida Aruba ta un yamada pa recupera nos sentido di responsabilidad comparti y haci cuido di nos isla bira parti di nos bida diario. Gobierno di Aruba ta anima tur hende pa uni den e esfuerzo, pasobra cuido di Aruba ta responsabilidad di nos tur.
