Parlamentario Jennifer Arends-Reyes a participa na un encuentro cu Sr. John Leerdam, representante di Nationaal Slavernijmuseum di Amsterdam. E encuentro, cu a tuma luga na Aruba Ocean Villas, a wordo organisa pa Jonathan Vieira, hunto cu un grupo chikito di amante di cultura.
Durante e encuentro, e presentenan a dialoga tocante e importancia di conserva y conta historia di sclavitud. Tambe nan a intercambia idea riba e manera cu un museo por yuda comunidad, y specialmente generacionnan nobo, compronde mihor loke a pasa den pasado y con esaki ainda ta influencia nos sociedad di awe.
“Nos historia tin momentonan bunita, pero tambe tin partinan doloroso. Si nos kier compronde nos mes mihor, nos mester tin e curashi pa papia di tur dos. No pa keda pega den pasado, sino pa siña di dje y sigui dilanti,” Arends-Reyes a expresa.
Segun e parlamentario, ta importante pa Aruba sigui registra, conserva y comparti su propio historia. Tin hopi relato, testimonio y experiencia cu mester documenta, pa nan no bay perdi y pa nos muchanan y generacionnan futuro por conoce nan origen y compronde di unda nan ta bin.
Arends-Reyes a describi e encuentro como interesante y valioso, ya cu el a crea un espacio pa dialoga di forma habri, tende diferente punto di bista y reflexiona riba nos pasado comparti. E intercambio a reafirma e importancia di duna historia un lugar central den educacion, cultura y formacion di identidad.
E parlamentario a gradici Jonathan Vieira, Aruba Ocean Villas, e grupo di amante di cultura y e delegacion di Nationaal Slavernijmuseum pa e invitacion y e intercambio enrikecedor.
“Conoce nos pasado ta yuda nos compronde nos presente y construi un futuro mihor,” Arends-Reyes a conclui.
