Prome Minister Mike Eman a representa Reino Hulandes durante e ceremonia oficial di cambio di mando y instalacion di Keiko Fujimori como Presidente di Republica di Peru. E ceremonia principal a tuma luga durante un sesion solemne den Congreso de La Republica, caminda Keiko Fujimori a huramenta como Presidente pa e periodo 2026-2031, a ricibi e banchi presidencial y a dirigi su prome mensahe na e nacion Sur Americano.
Entre e mandatarionan presente tabata e presidentenan di Argentina, Bolivia, Chile, Ecuador, Honduras, Panama, Paraguay y Uruguay. Rey Felipe VI di Spaña tambe a atende, hunto cu varios otro ex-presidentenan, vicepresidentenan, ministernan, hefenan di mision special y otro dignatarionan internacional. Prome Minister Mike Eman tabata presente como e prome mandatario di Gobierno di Aruba y representante di Reino Hulandes.
Den su discurso, Presidente Fujimori a indica cu su Gobierno lo concentra riba shete prioridad nacional. Entre nan ta siguridad di ciudadano, prevencion pa fenomeno El Niño, proteccion social, inversion den infrastructura, modernisacion di e aparato gubernamental di Peru, sostenibilidad fiscal y fortalecimento di democracia y e relacionnan internacional. E Presidente a anuncia un plan nacional di prevencion pa fenomeno El Niño, modernisacion di Polis, combati crimen organisa y corupcion, y un reforma di e sistema di prizon. E a pone enfasis tambe riba proteccion di mucha, famia y adulto mayor, mehoramento di educacion publico y mas oportunidad pa hobennan. Den area economico, el a anuncia aumento di salario minimo na 1.300 soles (690 florin), apoyo pa micro y pequeño empresanan, promocion di inversion y eliminacion di trabanan burocratico. E meta ta crea mas empleo formal y laga Estado funciona di forma mas eficiente y transparente. Den politica exterior, Peru lo fortalece integracion regional via Alianza del Pacifico y Comunidad Andina, y busca mas cooperacion cu paisnan di Asia, Medio Oriente, Latinoamerica y Caribe.
Despues di e sesion den Congreso, Presidente Fujimori a traslada pa Palacio di Gobierno, caminda el a ricibi honornan di Estado y a participa den saludonan oficial y encuentronan cu e mandatarionan y e dignatarionan internacional. Presidente Fujimori a cera su mensahe cu un yamada pa dialogo, unidad y reconciliacion nacional. El a enfatisa cu su Gobierno tin 1.826 dia pa traha cu disciplina, meta cu por midi y rindi cuenta pa logra un Peru mas sigur, inclusivo y prospero.
