QUO VADIS ARUBA !
Salario Miyonario den Nv nan di Gobierno ?
Constantemente mester tende politiconan hulandes ta comenta cu tin directornan di nv’s estatal cu ta gana un miyon florin pa aña na salario. Nan kizas ta referi na ex-director di Banco Central di Antiyas y director di SVB Corsow. Segun e politiconan hulandes tur director di empresa di gobierno ta gana un salario miyonario. Nan mester stop cu nan shisheria di insinua y instiga e pueblo cu informacion falso cu e proposito pa duna hende rabia riba politiconan na Aruba.
Esaki ta tipico hulandes: “verdeel en heers. Tur isla no ta igual y nan mester menciona nomber na cual empresa na Aruba tin salario di un miyon florin pa aña. Ta sigur cu NINGUN director di ningun empresa di gobierno na Aruba ta gana semehante salario, Si tin hende ta gana e suma aki den pasado, anto e suma a bin e.o. di ganashi di baho mundo of corrupcion na gran escala. Y ta casi sigur cu esnan cu tabata gana e salario aki na Corsou, a tuma e costumber aki over di e hendenan cu tabata ocupa e puestonan aki prome cu nan y casi tur tabata Hulandesnan.
Ta conoci cu un compania di inversion hulandes a traha riba WEB y ELMAR pa haci nan N.V. ta nan a bin cu salarionan halto pasobra nan mes tin salarionan barbaro. Awor e mesun hulandesnan aki kier pa baha e salarionan aki cu nan mes a bin cune. Ta casi sigur cu tin directornan di empresanan estatal hulandes ta gana mas cu e Balkenende -norm. Y ken sa cu e Hulandesnan cu Knops kier nombra den e RFT probablemente ta gana mas cu e Balkenende-norm tambe!
Ta conoci tambe cu Hulanda a manda tecnische bijstanders cu nan salario ta dobbel di e salario di nan ccolega Arubano haciendo e mesun trabao. Na dept. di Finanzas tabatin un cu tabata cobra mas cu 50 mil pa luna mas varios otro beneficio. Na Aruba awor nan mester tene nan mes na e Wever-Croes-norm si nan bin pa fiesta y solia aki banda. Ta increibel con e hulandesnan ta pensa. Awor nan kier subi edad di pensioen te na 67 aña. Pero tempo cu un cantidad di Hulandes ( Mariniers, polis, maestronan, tecniconan religiosonan etc.) a bin aki banda, tur a goza di e asina yama “Tropenjaren-pensioen”, pasobra nan mester traha den un clima calor. Si un polis of maestro hulandes traha p.e. 15 aña banda di un polis of maestro Arubano, e hulandes tin e ora 30 aña pa pensioen y por bay goza di su pensioen na edad di 40 aña, mientras cu e Arubano ta keda cu su 15 aña pa pensioen y si e tin suerte e por bay cu pensioen cu su 55 of 60. Di e tempo nan aya caba nan tabata tuma nos haci y awor nan kier sigui haci igual.
Nos mester atrobe tolera tur esakinan boca cera ???????
