Na aña 2011, Bestuur di AVP a duna Canadian Bank Note un GoldenDeal di 11 miyon pa aña.. si resta, deporte ta haya!
Fundacion Lotto pa Deporte ta genera un bon benta na su loterianan cual ta alcansa den careda di 50 miyon florin pa aña.
Ensi por papia di un benta halto, pero cu no ta genera placa pa Deporte, sino pa e compania Canades, Canandian Bank Note.
Desde aña 2011, bao maneho di Ex Minister Mike de Mesa, e fundacion a malgasta asina hopi placa, cu banconan local a perde confiansa den e fundacion. E unico scapatorio tabata pa entrega e loteria na Canada pa 15 aña, pa asina na por a para garantia na banco, pa e fundacion por a sigui na bida.
Aki e pesadiya di Deporte a cuminza. Tur ganashi ta bay pa Canada. Un total di 11 miyon pa aña, surpasando 100 miyon florin den ultimo 11 aña.
Canada ta gana, Lotto ta perde:
E rapport anual di Grand Thorton ta mustra cu Lotto a perde 3 miyon na 2018 y 2 miyon na 2019. Aña 2020 y 2021, maske cu a kibra record di benta, Canada ta gana, Lotto ta perde y deporte no ta ricibi su placa!
Lotto debe Stichting Sport Subsidie hopi placa, algo cu a wordo declara publicamente dor di Sra. Nicole Hoeverts ( ex secretario di conseho di Minister di Mike Eman), unda el’a mustra su rechaso pa e maneho di Lotto. Pa causa cu Lotto no ta paga stichting sport subsidie, hopi programanan deportivo local y internacional a cay na awa.
E conclucion ta cu Lotto no por sigui den e mal structura actual causa pa mal maneho di bestuur di Avp, nombra y respalda pa gobierno di Avp.
E contract luctrativo di Canada no por keda riba pia. Canada no por sigui ranca placa di Deporte n’e forma actual.
E error cometi pa bestuur di AVP, tardi of tempran mester wordo corigi.
SOLO DI PUEBLO poco poco ta mirando un avanse, ora a bini cambio di bestuur y awor cambio di director na Lotto. Mester re ahusta e visionnan pe banda corecto! Canada semper ta keda mas cu bon bini cu nan technologia y experticio, pero no cu e goldendeal duna pa AVP di 11 miyon pa aña.
Nos ta para na banda di Deporte y ta spera cu pronto por sigui mira mas cambio.
