Prome Minister Mike Eman a representa Aruba y Reino Hulandes durante e ceremonia oficial di cambio di mando y instalacion di Keiko Fujimori como Presidente di Republica di Peru. E ceremonia principal a tuma luga durante un sesion solemne den Congreso de la Republica, caminda Fujimori a huramenta como Presidente pa e periodo 2026-2031, a ricibi e banchi presidencial y a dirigi su prome mensahe na nacion Peruano. Entre e mandatarionan presente tabata e presidentenan di Argentina, Bolivia, Chile, Ecuador, Honduras, Panama, Paraguay y Uruguay. Rey Felipe VI di Spaño tambe a atende, hunto cu ex presidentenan, vicepresidentenan, ministernan, hefenan di mision special y otro dignatarionan internacional. Prome Minister Eman tabata presente como e mandatario di mas halto di Gobierno di Aruba y representando Reino Hulandes.
Un recepcion caloroso pa Aruba
Despues di e ceremonia, Prome Minister Eman a destaca e manera caloroso cu delegacion di Aruba a wordo ricibi na Lima.
Segun Eman, Peru tin hopi respet pa Reino Hulandes, pero na mes momento ta existi un simpatia creciente pa Aruba. E conectividad directo di LATAM Airlines y e aumento den cantidad di turista peruano cu ta bishita nos isla ta contribui na e acercamento aki.
“E calor cu cual nos a wordo ricibi tin dos motibo: hopi respet pa Reino Hulandes, pero tambe un calor y simpatia creciente pa Aruba. Bo ta sinti cu e interes pa nos isla ta creciendo”, Prome Minister Eman a declara.
Eman a splica cu e cariño pa Aruba tabata claramente visibel entre e publico presente. Cada biaha cu nomber di Aruba a wordo menciona, hende den e careda tabata reacciona cu entusiasmo.
“Ora nomber di Aruba a wordo menciona, bo por sinti e emocion den e multitud. Hende tabata grita ‘Aruba, Aruba’ y mustra nan cariño”, Eman a bisa.
Durante e actividadnan, Prome Minister a topa tambe cu miembronan di e comunidad peruano cu ta biba na Aruba. Varios di nan a reconoce Prome Minister y miembronan di e delegacion, a yama nan na nomber y a comparti un saludo caloroso.
“Nos a topa cu un comunidad chikito di peruano cu a reconoce nos y yama nos na nomber. Nos a brasa otro. Nan ta amigonan leu di cas, pero na mes momento cerca di cas”, Eman a declara.
Encuentronan cu lidernan di region
E instalacion presidencial a reuni un cantidad importante di mandatario y dignatario internacional na Lima. Prome Minister Eman a usa e oportunidad pa fortalece relacionnan existente y establece contacto nobo cu lidernan di America Latina.
Durante su estadia, Eman a combersa cu e presidentenan di Bolivia, Panama, Ecuador y Peru. E delegacion di Aruba a tene un reunion bilateral cu Keiko Fujimori y a conoce tambe e lidernan di Congreso peruano.
Prome Minister Eman a intercambia ideanan cu presidente di Paraguay, Santiago Peña, y presidente di Chile, Jose Antonio Kast. E a topa tambe cu ex presidente chileno Eduardo Frei, cu kende tin un relacion di amistad di hopi aña.
“Lazonan cu ta existi pa hopi tempo a wordo profundisa y otro relacion nobo a wordo crea. Tabata un biahe cortico di dos dia y mei, pero hopi efectivo, cu reunionnan y encuentronan cu tin balor pa Aruba”, Eman a declara.
Prioridadnan di Gobierno Fujimori
Den su discurso inaugural, Presidente Fujimori a presenta shete prioridad nacional pa su Gobierno. Entre nan ta seguridad di ciudadano, preparacion pa fenomeno El Niño, proteccion social, inversion den infrastructura, modernisacion di aparato gubernamental, sostenibilidad fiscal y fortalecimento di democracia y relacionnan internacional.
Fujimori a anuncia un plan nacional di prevencion pa fenomeno El Niño, modernisacion di Polis, combate contra crimen organisa y corupcion, y reforma di sistema di prizon.
E a pone enfasis tambe riba proteccion di mucha, famia y adulto mayor, mehoramento di educacion publico y creacion di mas oportunidad pa hobennan.
Den area economico, Presidente Fujimori a anuncia aumento di salario minimo na 1.300 soles, apoyo pa micro y pequeño empresa, promocion di inversion y eliminacion di traba burocratico. E meta ta crea mas empleo formal y laga Estado funciona den un manera mas eficiente y transparente.
Den politica exterior, Peru lo busca fortalece integracion regional via Alianza del Pacifico y Comunidad Andina, y amplia cooperacion cu paisnan di Asia, Medio Oriente, America Latina y Caribe.
E prioridadnan aki ta crea diferente posibilidad pa Aruba y Peru traha hunto, especialmente den seguridad, turismo, agricultura, maneho di awa, sostenibilidad y desaroyo economico.
Saludonan oficial na Palacio di Gobierno
Despues di e sesion den Congreso, Presidente Fujimori a traslada pa Palacio di Gobierno, caminda el a ricibi honor di Estado y a saluda e hefenan di Estado y Gobierno presente.
Prome Minister Eman a participa na e recepcion y almuerzo oficial ofreci na honor di e dignatarionan internacional.
Presidente Fujimori a cera su prome mensahe na nacion cu un yamada pa dialogo, unidad y reconciliacion nacional. El a enfatisa cu su Gobierno tin 1.826 dia pa traha cu disciplina, meta cu por wordo midi y obligacion pa rindi cuenta na pueblo peruano.
Participacion di Prome Minister Eman na e instalacion presidencial a confirma Aruba su posicion como un socio activo den Caribe y America Latina. E bishita a fortalece relacionnan politico y diplomatico, mientras cu a crea perspectiva nobo pa turismo, comercio y cooperacion entre Aruba, Peru y Reino Hulandes.
