ORANJESTAD – Prome Minister, Evelyn Wever-Croes hunto cu e Comision Nacional di SDGs, ta informa cu a cancela pa motibonan imprevisto e sesion virtual consultativo di diamars dia 30 di november. E sesion mester a tuma luga cu participantenan di sector priva, NGOs y demas instancia, cu e meta pa obtene informacion pa raporta na Nacionnan Uni hunto cu Reino na 2022. Cu e comunicado aki nos ta informa cu e sesion ta tuma luga awo riba un solo dia, esta Diaranson mainta dia 1 di december di 9’or di mainta pa 12’or di merdia.
Prome Minister Wever-Croes y Minister di Economia, Communicacion y Desaroyo Sostenibel lo hiba algun palabra na e sesion consultativo. E sesion aki ta duna e oportunidad di por intercambia di idea y inspira otro. A caso no logra participa, ta puntra encarecicadamente pa yena e cuestionario cu a ricibi hunto cu e invitacion.
Comision Nacional di SDGs ta encarga cu e raportahe di e Metanan Mundial pa un Desaroyo Sostenibel na Nacionan Uni y den cuadro di esaki ta colaborando cu diferente stakeholders pa acumula bon practicanan y otro informacion relevante tocante e contribucion na e implementacion di SDGs na Aruba. Por haya mas informacion ariba nos website www.sdgaruba.com.
