Obispado di Willemstad ta anunsia ku gratitut i solemnidat ku Santa Sede – Vatikano a nombra Mgr. Jason Gordon, Arsobispu di Arkidiosesis di Port of Spain, Trinidad i Tobago, komo Atministrador Apostóliko di Obispado di Willemstad. E nombramentu aki ta tuma lugá despues ku Mgr. Luis Secco, nos kerido Obispu ta bai ku penshun despues di hopi aña di entrega i liderato pastoral.
Obispado di Willemstad kompletu ke ekspresa su gratitut profundo na Mgr. Luis Secco pa su dedikashon inkansabel, kuido pastoral, í liderasko spiritual durante su tempu di sirbishi. Su legado di entrega, marká pa su gran kompromiso ku pueblo di Kòrsou, Boneiru, Aruba, Sint Maarten, Saba i St. Eustatius, lo keda komo inspirashon pa generashon di awe i manan. Nos ta desea pa Dios sigui bendishona su bida i duna bendishon na e etapa nobo di su bida.
Un Atministrador Apostóliko ta un Obispu ku Santa Sede ta nombra pa yuda ku e gobernashon i kuido pastoral di un Obispado den un periodo di transishon. Mgr. Gordon, konosí pa su zelo pastoral í su deseo pa fortifiká komunidatnan di fé, lo guia Obispado di Willemstad ku sabiduria i deboshon durante e tempu aki.
Obispado di Willemstad ta duna Mgr. Gordon un kaluroso bon biní den su ròl nobo i ta sigurá su orashon i sosten pa e mishon importante ku e ta asumí.
Ku Dios sigui bendishoná nos Diosesis, i ku nos keda uní den fé mientras nos ta sigui avansá bou di guia di Spiritu Santu.
