Parlamentario Ricky Hoek (MEP) respuesta na Ryçond:
Ryçond ta e Mastermind den laba man – parti 2
Aruba 21 Februari 2024: MEP no ta cobarde pa atende corupcion. MEP ta atende cu corupcion manera mester ta. Di frente! Esaki no ta oposicion di AVP cu ainda tin un candidato den banki di parlamento apesar cu e a wordo husga. Sr. Ryçond a ‘stond erbij en
keek ernaar’! Asina Parlamentario Ricky Hoek di Fraccion di MEP a reacciona riba e ponencia di Parlamentario Independiente Ryçond Santos Do Nascimento.
Riba e relato cu Sr. Do Nascimento a manda ultimo mi lo ta contestando lo siguiente. “Ta obvio cu na momento partido POR su corupcionnan a sali na cla, MEP mes a ranca plug y manda gobierno cas. Aki no tin wega, ta serio nos ta goberna. Ryçond a lubida di agrega cu Marisol tempo e tabata Minister a comete fayo door di opera incenerator sin Hindervergunning, pero mi no ta mira Ryçond ta bisa nada riba e ‘Reina di gaslighting’ Lopez Tromp. Kisas ta pasobra Ryçond tin aliansa cu MAS caba?
Ryçond tin rason, ora e bisa ‘dime con quien andas’, pasobra Ryçond tabata anda cu AVP, y awor cu ‘Reina di Gaslighting Tromp’. Di berdad nos ta hayando un bista kende Ryçond ta. E no bin busca pa hiba MEP na e nivel ey cu su splicacionnan eroneo ta indica. Awor cu Ryçond no a haya nada cerca esnan den seno activo den gobernacion y falta palo pa dal cacho, el a bay pa busca riba nivel di activistanan. Esakinan mescos tur ciudadano tin di carga nan propio responsabilidad ora actonan incorecto wordo cometi.
E asunto no ta complica, si ta ‘Vacuna gate’, esnan cu a faya a haya. Caso Kwihi esnan cu a faya a haya. Y pa caso Tulipan e lo ta mesun cos. MEP no ta bay critica Ministerio Publico. Ni stroba e investigacion. Nos ta laga nan haci nan trabou. Pero atrobe concientemente Ryçond ta lubida di bisa cu caso Kwihi e persona involucra tabata lider di partido di MAS, mustrando atrobe riba e hecho cu e kier troce cos y hunga cu nos inteligencia.
Lag’e ta bon cla, ningun momento MEP kier pretende cu cualkier institucion na mundo por crea un pais liber di corupcion, integridad ta un scogencia personal di cada ser humano. Loke MEP a ilustra si ta, corupcion no ta tolerabel den ningun forma y pa ningun
hende den su organisacion.
Awor cu ta falta argumento, Ryçond como profesor y ‘mastermind’ di laba man kier tilda mi di no a yega mas leu cu derde klas, mustrando su arogancia como si fuera cu sabiduria di mundo e so tin e.
Mi kier pidi Ryçond pa e mantene su mes na e punto di e tema. No insulta esnan cu no a caba scol o no tin un estudio academico. Pasobra tin hopi Rubiano cu no a caba scol cu tin hopi sabiduria y cu a yuda construi nos pais cu trabou duro di nan mannan. Ta pa nan mes
nos ta sali na defensa, y como social democrata no ta permiti bo insulta nan tampoco.
Pa bin bek riba e topico y sigui informa, MEP den parlamento a presenta leynan contra corupcion y ya caba mi a menciona cua leynan. Pa prome biaha den historia politico cu e leynan aki a wordo presenta, a vota riba nan y a keda aproba den parlamento. Sin conta
‘Integriteitskamer’ y otro pasonan concreto cu Gabinete Wever Croes 1 y 2 a tuma. Nos por bisa cu nos a haci esakinan, kico profesor di ley Ryçond ley a entrega na parlamento pa combati e fenomeno aki? Absolutamente nada! Banda di traha proactivo pa elimina corupcion, MEP a traha tambe na combati patronahe politico pa medio di: 1) pone un cantidad maximo di 25 persona cu por traha na un bureau di minister 2) a introduci un organogram pa bureau di minister 3) ta paga tur trahado conforme e bezoldigingsregeling di Aruba 4) e persona mester cumpli cu e rekisitonan di e organogram y bezoldigingsregeling 5) a introduci un beleidsplan verlaging personeelskosten 6) desde 2018 gobierno a baha e cantidad di empleado publico structuralmente. Cu un mente y pensamento ainda colonisa, Ryçond ta sigui busca pa sconde tras di Hulanda, como si fuera Hulanda ta interesa pa soluciona nos problemanan. Ta nos mes – Gabinete Wever-Croes 2 – y nos hendenan ta trahando na drecha nos pais.
Awor pa mi caba di claba e clabo riba e caha di Ryçond, pasobra mi lo no sigui reacciona riba dje despues di e relato aki. E kier bisa cu e no ta e ‘mastermind’ tras di Benny ni Paul ni Hooyboer, mi punto ta bo a join AVP si sabiendo tur esaki di antemano. Bo ta un meester in de rechten, bo por a mira cu e destinacion final tabata condena pa Paul y Benny. Dicon bo a join? ‘Dime con quien andas y te dire quien eres’. E ta duidelijk awor?
