Awe mi kier a saluda tur lector cu un “Bearhug grandi”, esta un braza fuerte grandi diki gordo Ta algo cu hopi hende ta anhela di hanja, pero cu e distanciamento social esaki ta pega, tranka. Aunke den famia si esaki ta possibel. Tur dia mi casa ta brazami y ami ta braze, duna otro sunchi
y bisa cu palabra tambe cu nos ta stima otro. Pero esaki ta un di e basenan di nos fundeshi fuerte
di nos relacion matrimonial ya bayendo pa 43 anja, dia 21 di December venidero Dios mediante.
Awe mi kier a manda un braza foi distancia tambe pa mi amiganan grandi, mamanan sin dolor di
mi : Mi bisinja Majorie Eman, Mena Swengle, Sra. Pietersz, y tambe un crenchi mas leu Elena,
Eta y specialmente pa Mona de Mei den curazon di Sero Lopez y pa Estrellita Ruiz den curazon
di Meiveld. Y pa otronan cu tambe ta hanja nos falta en persona. Mi tambe ta hanja boso falta, di sinta combersa un crenchi, bebe koffie. Nos tambe ta yena nos dianan cu cosnan positivo activamente, mientras sali hasi compras un ves pa siman cu nos tapaboca bisti, manera mayoria of tur supermercado ta pidi. Si no ta pa e dushi musica cu mi por scucha tur dia, lo mi a bira “tureluu” hopi dia caba. Awor mes, ta keto pafo y paden, solamente mi a pone musica di Bob Marley awor, “Don’t worry about a thing, every little thing is gonna be all right “ y esey nos tur ta spera, carga speranza y cu fe ta accepta cada dia como un regalo precioso bunita di nos Creador. Cu dolor na curazon, ora ta lesa of tende y mira na canalnan di televishon mericano e protestanan den turbulencia na Merca keto bay. Riba face book nos a mira cu na Hulanda tambe algo fastioso a sosode, ora cu un polis a dal y of pusha un sra.grandi di edad lage cai abao. Podise, hasta grandi den edad, e protesta pa con cos ta bayendo y ta exigi libertad pa sali sin tapaboca y biba nan bida trankil sin molestia niun hende. E pregunta ta reis : Ken tin mas miedo anto di muri, e politiconan, e autoridadnan, of e hendenan den pueblo ? Nos a yega di expresa den un otro relato, cu nos tur sa , cu, muri nos tur tin cu muri un dia y ta nos Creador di amor so sa con, ki dia y na unda. Semper tawatatin otro virusnan, otro malesanan, accidentenan etec.cu sa pone fin na bida di hende. Bo ta tende tambe, come saludabel y bebe hopi awa y of hopi likido cayente. Tuma extra vitamina. Como Poeta Lady Ruth tawata di pensamento un biaha, cu , si bo tawata tin algo of cosnan scondi ja pa hopi tempo, cosnan cu bo a hasi cu bo no mester a hasi, podise awor bo consenshi ta kick in . E cantica country ta bini na mente di “it’s cheating and stealing” “violence and crime” Lord for my sake, teach me to take One day at a time “ – Pasobra ban ta honesto, tur hende kier muri trankil y bai na paz un dia. Wak nos hobennan cu no ta worry mes ni cu nan mes, corda cu otro. Nan ta pensa na sali y dal drinks goza di bida. Esey ta algo fout ? Nos no ta kere, nos tambe tawata hoben y rebelde un dia hopi anja pasa. Pero….ta prome biaha nos ta den y tin un Virus covid-19, corona virus aki na Aruba cu por causa morto di varios hende cu ta vulnerabel pe virus. Lady Ruth no ta pretende cu e si ta imuun of fuerte, nos no sa ki dia Papa Dios lo bin tuma Lady Ruth bek. Dios ta duna, Dios ta tuma. Tin cu por pensa anto, awel, “los laga bai”, mi ta bai muri tog ! Y tin hopi na rudia tur dia ta reza pa pordon y pa sanacion pa nos pueblonan rond
mundo. Vaccuna of no ? Mi ta kere cu esey tambe ta decision cu cada hende tin cu tuma pa su
mes. Poeticamente a kere un biaha hasta cu ta “Papa Dios ta bezig ta ruim op de boel y ta limpia
Mama Tera pa tin hendenan cu ta stima y cuida e lugar unda nan ta biba, sin tira sushi abao, sin
tira sushi den lama, etec…Of ta duna nan un chens di mehora nan higiena pa cu nan mes y nan
famia, pa di berdad laba man, podise cos cu hopi no sa hasi regularmente ora di caba di usa w.c.?
Asina tur hende tin mil y un pregunta, y tur kier pa tin un fin na e covid-19 . Shonnan, ban tuma e regalo dia, dia pa dia, cu gradicimento na nos curazon cu mester bira mas humilde, sin arogancia. Pordona otro pa cualkier fayo of insulto. Y laga los locual bo no tin control di dje. Papia cu Dios den oracion. Duna danki pa bida, pa amor, pa sabiduria den bo mesun alegria ! Corda cu tur ser humano ta unico. Pero tin cu mester sinja adapta y cuida nan mes mihor. Nos a bin pa inspira otro y yuda otro, cu amor y compasion. Cuminsa den bo mesun cas, den bo mesun famia. Por Dios stop cu violencia den tur sentido di palabra. Pa si bo dia di bay yega, bo por bay na paz. Dios ta amor. Dios ta bon. Dios semper ta bon. Danki pa lesa nos palabranan poetico cu por tin berdad den nan.Aruba ta nos. Nos ta Aruba. Stima bo mes y bo isla. Stima bo mes, pa bo por stima bo prohimo. Cuida shonnan. Pasa un dushi dia cu hopi sabiduria den bo alegria !!
