Ayera nochi a continua cu e ultimo modulo di e prome parti di e “Sports Adminstration Course” (SAC), unda Sr. Dave Martinus ta sigui elabora e rol di un Presidente dentro di un organisacion deportivo. Durante e les aki, a trata mas bien e proceso di con pa maneha un reunion efectivamente y e proceduranan parlamentario pa por haci esaki. Pa por efectivamente splica e temanan aki, a no solamente trata e parti di teoria, si no a traha riba un proyecto den grupo pa asina por aplica locual a wordo splica y use den un situacion real cu por pasa na Aruba.
Presidente di Comite Olimpico Arubano (COA) Sra. Wanda Broeksema tambe tabata presente, compartiendo cu e grupo di dirigentenan deportivo, y aportando na e curso cu su experiencia como presidente di un organisacion deportivo. Wanda a hiba palabra, felicitando tur cu ta participa den e curso aki, como e ta un indicacion di e deseo di tur pa traha hunto pa mehora e nivel di deporte na Aruba. A mira un bon presentacion di tur presente, mustrando gran interes den e les y pa compronde di berdad con pa maneha un organisacion deportivo.
