Santa Rosa cu un yamada na tur nos Piscado, awo cu Temporada di Cuaresma a inicia: “Piscadonan ban tene cuenta cu seguridad riba lama”

0
39

Oranjestad,– Ora cu ta temporada di cuaresma, Pisca fresco ta bira manera oro. Tur hende tin e tradicion y/of creencia cu tur diaranson y diabierna ta dia di come Pisca durante e temporada di cuaresma. Esaki cosequentemente ta conduci, cu e demanda local pa Pisca ta subi drasticamente. Esaki sin duda ta pone un presion halto ariba nos Piscadornan cu na momento cu e demanda ta halto, nan ta opta pa bay mas biaha lama y asina cumpli cu e demanda di e cliente ya cu hopi ta esnan cu ta desea di saboria un pida Pisca fresco. Sinembargo, nos lubida ariba e trayectoria cu e piscado ta pasa aden y mas ainda e trabou duro den solo y e peliger cu eta core na momento di subi lama of te hasta piscando nan baranca apesar di e biento halto.

Pa e motibo aki, cu Santa Rosa kier asegura cu tur nos Piscadornan ta tene cuenta cu e parti di seguridad ariba lama y kiko ta e diferente conseho cual ta importante pa tene cuenta cu ne. E conseho nan aki no solamente ta yuda prome cu subi lama, pero tambe durante cu e Piscador t ta ariba lama piscando. Den caso algo por bai robez riba lama, e famia y autoridad lo por tin un miho bista cua ta e rumbo cu e piscadonan a bai y tur informacion relevante pa autoridad of pa esnan cu ta bai duna asistencia y ehecuta cualkier buskeda.

E meta di e conseho nan aki ta pa promove seguridad pa tur nos Piscador nan di Aruba, tanto den boto como esnan piscando for di baranca. Corda cu e seguridad ta responsabilidad di tur Piscador tanto den boto, na baranca y tambe pa esnan cu ta pisca cu harpoen. Controla prome cu Sali pa bay pisca, pa semper bo ta bon prepara.

Si nos tur sigui e recomendación nan, percura pa e “check list” keda yena y conta cu tur articulo nessecario a bordo di nan boto, e piscadonan lo no mester precupa si encaso algo bay robez y nan famia tambe lo ta mas tranquil na momento cu nan sernan keri sali bay pisca.

Kiko ta e diferente equipo di seguridad cu Santa Rosa ta recomendabel pa bo tin abordo di boto:

  1. Life vest of por lo menos un salbabida abordo, especialmente pa esnan cu no por landa.
  2. Suficiente cabuya di anker
  3. Por lo menos 2 galon di awa fresco abordo
  4. Radio (Corda cu un celular no ta funciona lew for di costa)
  5. Spiel pa duna señal
  6. Compas
  7. GPS
  8. Fluit
  9. First-Aid Kit
  10. Sunblock y un sombre/pechi
  11. Aparato pa paga candela
  12. Flashlight
  13. Productonan di consumo cu no ta dana lihe manera crackers, producto den bleki cu por habri fácil, juice den bleki of paki etc.
  14. Un shirt manga largo cu por proteha den dia contra solo y den anochi si bira friew.

Scenario pa caso di emergencia cu piscado

Proceso # 1 (responsabilidad di piscado)

Na momento di traha plan pa bay pisca, e promer paso ta cu mester tuma ta, avisa su famia directo of bisiña.

Den caso cu e piscado ta biba su so, y mester avisa un familiar, bisiña of amistad. E informacion cual nan mester duna ta por ehempel; e lugar di pisca of e area general na unda nan a bay pisca. E horario cu bo ta sali bay pisca y ora cu bo tin planea di ta bek na pier. Si tin radio abordo, tuma contacto via radio y duna bo GPS of sitio na Havenkantoor di APA.

Proceso # 2 Famia ta raporta piscado perdi na Kustwacht na number di telefoon: 913

Mester jama Kustwacht na number 913 di inmediato, pa meld cu e Piscador nan no a drenta na e ora stipula y asina bati alarma pa cuminsa cu búsqueda. Pa medio di famia autoridad ta haya sa unda e locación di piscadonan ta. Autoridad lo mantene contacto cu famia pa duna informacion di e resultado di buskeda. Aki e “checklist” ta hunga un rol importante. Mas extenso esaki wordo jena, miho e lo contribui na e buskeda.

Kiko tur mester wordo agrega na e checklist:

  1. E promer informacion importante: duna e coordinada di e sitio di pisca. Si bo no tin GPS, menciona e marca of area general di pisca.
  2. Nomber di e boto
  3. Number di registración di Directie Scheepvaart
  4. Size di e boto
  5. Color di e boto, for di bista horizontal
  6. Color e boto tin? For di bista di ariba
  7. Cuanto motor e boto tin?
  8. Cual ta e marca di motor y su color?
  9. Ki ora nan a sali bay pisca?
  10. For di cual pier of unda mi boto ta mara?
  11. Cua canal di radio mi ta usa?
  12. Menciona e nomber di e piscado nan abordo di e boto:
  13. Si nos cambia di lugar, lo mi raporta via radio na APA.

Den caso di Pesca na Baranca:

  • Informa famia den cua area bo lo ta piscando.
  • Indica e horario cu bo lo bolbe bek cas.
  • Considera bisti un life vest si bo no por landa, especialmente den area caminda e lama ta bruto of cu tin biento duro.
  • Por hiba tambe un salba bida cu cabuya cu por wordo tira den awa den caso di cualkier incidente.
  • Si ta anochi, ta consehabel pa usa un flashlight di cabes cu ta waterproof pa bo tin bo man nan liber.

Proceduranan di seguridad, prome cu subi lama:

  • Check tempo, biento of otro caracteristicanan di lama. Tambe lo por check cu otro piscado of meteo su website. www.meteo.aw
  • Yena e parti di e checklist cu informacion di e boto.
  • Yena e informacion riba e checklist cu locacionnan di pisca y tambe lugarnan alternativa y specialmente laga informacion di con lo contact otro y orarionan di sali y bolbe.
  • Tuma bo checklist y revisa e parti di ekiponan di seguridad cu ta recomenda y yena esnan cu ta bay cune. Corda cu seguridad riba lama ta bo responsabilidad y percura pa bo tin mas tur ta posibel cu bo. Tambe yena e checklist honestamente.
  • Percura pa por lo menos un persona competente y di confiansa tin e informacion of sa unda pa haya e checklist den caso di emergencia.

Esnan den boto, den caso di emergencia:

  • Semper percura pa un hende na tera sa unda bo tin planea pa bay pisca. Tin diferente tecnologia pa registra esaki, pero ta importante pa mantene e área nan cu a wordo menciona ariba e riba e checklist. Si dicidi pa cambia di área di pisca cu tin marca ariba e checklist prome cu sali, ta importante pa yama y notifica esun cu ta pending di e piscadornan cu lo bay pisca.
  • Na momento cu tin cualquier calamidad, e prome paso cu bo tin cu tuma, ta notifica famia of amistad via radio of celular, bo posicion y kico ta e problema. Tin diferente nivel di emergencia. Dependiendo di e tempo cu bo tin, purba duna mas hopi informacion posible na momento cu bo hasi e melding.

Alarma for di tera:

  • Tuma contacto cu Kustwacht, cual ta e instancia central pa bati alarma den caso nan di Piscador nan cu no a drenta na e ora stipula y cu no a meld via radio of celular cu nan lo drenta otro horario.

Mester jama 913. Por bati alarma na cualkier autoridad pero kustwacht ta esun central.

  • Kustwacht lo tuma contacto cu e otro instancia nan concerni y lo inicia e proceso segun e segun nan plan di procedura den caso nan di calamidad.

Nos Piscador nan di Aruba tin un tarea di suma importancia pa nos Sector Primario y pa Santa Rosa, nan bienestar y seguridad ta bin na prome lugar. Nos ta spera cu nos Piscador nan lo considera e tips nan cu a wordo duna pa asina nos Piscador nan por sigi eherce e ofishi cu tanto nan ta disfruta y cu nos comunidad pa sigi disfruta di Pisca fresco ariba mes.

“Ban pisca, pero semper cu seguridad den mente!

LEAVE A REPLY

Please enter your comment!
Please enter your name here