Segun Marisol el’a wordo gara di sorpresa diabierna den ministerraad cu carta p’e retira

0
687

Minister Lopez Tromp a bisa cu diabierna el’a wordo gara di sorpresa den Ministerraad cu un notificacion unda parlamentarionan di POR a kita sosten na su persona.

E mandataria a bisa cu el’a bay Ministerraad cu otro topiconan di agenda, unda lo mester dicidi pa mehora cierto funccionamento di departamentonan, pero diripiente a presenta un topico riba agenda.

Segun por bin compronde cu Minister Andin Bikker lo a “lock” ministerraad door di a exigi retiro di Lopez Tromp y na mes momenton a bandona sala di reunion, indicando cu e lo no sinta den ningun reunion unda Lopez Tromp ta sinta.

Despues tin rumor ta bisa cu un otro minister tambe a secunda Bikker y tambe a bandona reunion.

E momento ey a bini un crisis den gobernacion ya cu gobierno ta wordo dirigi door di Conseho di Minister. Cu un conseho di Minister unda ministernan no ta presente, ta haci imposibel goberna.

Ta netamente pa haci gobernacion posibel conseho di ministro a dicidi e ora ey pa temporalmente kita e cartera di Marisol pa asina gobernacion por sigui. Mas cu claro cu e proximo paso ta pa hiba e asunto aki parlamento.

Entrtanto Marisol a bisa cu e ta sali pa Hulanda pa hiba su yiu cu ta bay studia. Segun Lopez Tromp a bisa cu e lo bay keda un par di siman na Hulanda, pues no ta un viahe cortico.

Diasabra mainta a tuma lugar un intermediacion di coalicion, cual comicion ta forma pa Raymond Arends di POR, Robby Croes di RED, Swinda Winterdaal di MEP y hunto cu Ari Swaen. E comicion aki mester entrega nan rapport di loke nan a constata y entrege na lidernan di coalicion y na Gobierno pa djey por sigui encamina e proceso.

Un reconciliacion parce cu no ta posibel.

LEAVE A REPLY

Please enter your comment!
Please enter your name here