Durante un conferencia di prensa awe, Prome Minister Mike Eman y director di SETAR, ir. Roland Croes, a anuncia cu SETAR tambe ta uni su mes na e iniciativa Dia pa Cuida Aruba, cu lo tuma luga dia 25 di juli. E iniciativa tin como meta pa uni henter Aruba, sin importa nos diferencianan, pa pone man na obra y haci nos isla limpi. Prome Minister Eman a señala cu e iniciativa ta crece y cu cada biaha mas hende, organisacion y compania ta mustra nan interes pa yuda.
SETAR ta sostene e campaña na diferente forma. E compania nacional di telecomunicacion lo sponsor baki pa colecta sushi. SETAR lo cubri tambe e gastonan di transporte pa hiba e bakinan cu sushi na e luganan destina pa esaki. Ademas, SETAR lo uza su red di celular pa informa y recorda su clientenan tocante e actividad di dia 25 di juli.
ir. Roland Croes a splica cu e participacion di SETAR ta cuadra cu e manera cu e compania ta traha riba proteccion di ambiente, desaroyo sostenibel y bon gobernacion. Esaki ta forma parti di e metanan di desaroyo sostenibel di Nacionnan Uni. Segun Croes, mantene Aruba limpi ta responsabilidad di nos tur. Esaki ta importante pa habitantenan di e isla, pero tambe pa e impresion cu bishitantenan ta haya di Aruba.
Director di CEDE Aruba, Daniel Tecklenborg, a informa cu su organisacion lo coordina e diferente contribucion di compania, organisacion y boluntario. E companianan cu kier yuda cu personal, material, refresco, awa of un otro tipo di donacion por dirigi nan mes na CEDE Aruba. CEDE Aruba ta colabora cu Bureau City Inspector pa forma grupo di boluntario cu lo traha riba sitio specifico. Ya tin varios sitio cu mester di yudansa, entre otro na San Nicolas, Brazil y Cura Cabai Zuid. E companianan cu tin interes pa adopta un sitio por tuma contacto cu CEDE Aruba of registra via arubavolunteers.org.
Durante e mainta Yirman Pacheco di All Safety Wear a haci entrega di un donacion di material, incluyendo handschoen pa e boluntarionan cu lo pone man na obra. E la haci un yamada na tur comerciante, sobre todo esnan di origen latino pa tambe uni man y yuda e causa aki.
Varios centro di bario tambe ta participa den e campaña no solamente cu baki di sushi den nan parkeerplaats pero aki tambe lo parti saco di sushi disponibel pa miembronan di comunidad cu kier haci limpi den nan propio bario. A pidi tur participante pa lesa e instruccionnan bon riba www.arubatanostur.com. Material grandi y pisa ta ideal pa hibanan direct na Zona di Desperdicio na Barcadera mientras cu e bakinan den bario laga esaki principalmente pa sushi mas chikito y material cu ta piki canto di caminda.
Gobierno, SETAR, CEDE Aruba, comerci, organisacionnan y boluntarionan ta traha hunto pa haci e iniciativa un exito. E meta ta cla: uni como un solo pueblo pa cuida Aruba y mantene nos isla limpi.
