Mi ta yama,cielo y tera como testigo contra boso awe, cu mi a pone bida y morto boso dilanti, e bendicion y e maldicion. Pesey scohe bida,pa bo biba,abo y bo desendientenan,( Deuteronomio 30:19).
Juan 3 :16 : Pasobra Dios a stima mundo asina tanto , cu E a duna Su Yiu unigenito pa ken cu kere den dj’E no bay perdi ma tin bida eterna.
Cu esaki nos tur tin di comprende cu nos por scohe entre bon y malo, entre biba pa Dios of biba pa e sistema di mundo, scohe e caminda pa salbacion of scohe e caminda di perdicion.
Hende por scohe pa acepta Cristo Hesus como Senjor y Salbador of rechasa Cristo Hesus.
Si un hende kere cu e por biba un bida mitar cu Senjor y un bida mitar cu mundo e ta ganja su mes.
Sin un hende kere cu e por biba un bida religioso y idolatra y pensa den su cabes cu e ta salba e ta ganja su mes.
Pasobra religion no ta salba ningun hende, y Dios ta bisa pa nos libra nos mes di idolatria y warda nos mes di idolonan. ( 1 Juan 5:21).
Hopi hende ta kere cu despues di morto oracion por cambia nan direccion , na unda nan lo bay cerca Dios of pa fierno, pero tur decision mester wordo tuma ora nos ta na bida, pasobra despues cu nos muri nada no por wordo ahusta.( Lucas 16:19-31).
Awor bida ta mustra nos cu hopi cos cu hende hanja nan mes envolvi den dje ta nan mes a scohe.
Pasobra nan a rechasa e berdad, y asina duna e mentiroso cual ta e diabel ( Juan 10:10) porta habri pa haci locual cu e kier den nan bida.
Wak bon;
Aunke alcohol y droga ta malo hende ta scohe pa bebe y droga, y nan ta gasta placa den esey.
Aunke adulterio ta destrui famia, y traumatisa yuinan, toch hende ta hinca nan curpa den adulterio.
Aunke tin castigo di prison pa core burachi toch hende ta sigi haci mesun cos.
Aunke tin tin castigo di prison pa cana cu arma toch hende ta scohe pa esey.
Tin para scirbi riba e paki di sigaria, cu e por causa danjo y te hasta morto, pero hende ta sigi huma.
Tin castigo di prison pa bende droga , pero toch hende ta scohe pa esey , pensando cu nan lo bira rico.
Pa falta di conocemento of rebeldia contra e palabra di Dios, hende ta scohe pa hopi cos robes, y tin di nan ta bisa cu ta asina nan a nace.
Nos no tey pa husga hende, pero tin hopi cos desagradabel cu hende ta hanja nan mes aden cu ta nan mes a scohe.
Si un hoben no tende di su mayornan y ta cana cu hende di edad mas halto cune cu ta hinke den problema ta e mes a scohe.
Hopi biaha mayor ta papia cu nan yiu muhe y bise cu e persona cu e hunto cune ey no ta serio , nan no ta tende te ora nan sali na estado.
No duna diabel oportunidad den bo bida, no desvia for di e caminda di Dios, si bo ta cana den scuridad bo tin tempo pa arepenti, tempo pa confesa y tempo pa drecha cos cu Dios.
No tin situacion dificil cu Dios no por saca bo for di dje, no laga ningun hende ganjabo, lesa locual tin para scirbi den Salmo 103:3.
Si bo a scohe robes, arepenti awe mes.
Sinceramente, Pastor Marcel Balootje
