Dia 20 di november, mundo henter ta conmemora Dia Internacional di Derecho di Mucha. Esaki ta un fecha cu ta invita nos pa para keto, reflexiona y evalua con nos como sociedad ta cuidando, protehando y educando nos muchanan.

E dia aki a wordo estableci na 1954 pa Nacionnan Uni (ONU) como Universal Children’s Day, cu e meta pa promove bienestar y entendimento entre muchanan rond mundo.

A elegi e fecha di 20 di november pasobra ta riba e mesun dia ey, na 1959, Nacionnan Uni a adopta e Declaracion di Derecho di Mucha, y trinta aña despues, na 1989, a adopta e Convencion riba Derecho di Mucha, e tratado di derecho humano mas ratifica den historia. 

E tratado aki ta stipula cla cu tur mucha, sin excepcion, tin derecho riba bida, salud, educacion, proteccion contra violencia y abuso, y e derecho di expresa nan opinion y wordo scucha.

E aña aki, e lema oficial di UNICEF ta carga un mensahe sumamente poderoso y directo:

“My day. My rights. My future.” (Mi dia. Mi derechonan. Mi futuro.)

E lema aki ta pone e enfoke exactamente caminda e mester ta: riba e realidad di cada mucha awe, nan derechonan fundamental y e impacto cu esaki tin riba nan futuro. E ta corda nos cu derechonan di mucha no ta un fabor, ni algo opcional; nan ta debernan cu nos como adulto, mayor, educador, instancia y gobernante mester garantisa tur dia.

Durante e dianan cu a pasa, mi a comparti diferente reflexion riba e importancia di scucha e bos di un mucha. Hopi biaha nos ta pensa cu un mucha lo papia ora algo ta molestia nan, pero e realidad ta cu silencio, miedo of un cambio di comportacion por ta nan unico forma di pidi yudansa. P’esey, e lema “Mi dia, mi derechonan, mi futuro” ta exigi di nos na Aruba pa nos no solamente papia di derechonan, pero pa nos crea espacio sigur na cas, na scol y den bario unda nos muchanan ta sinti cu nan por expresa nan mes sin miedo di wordo husga of ignora.

Como parlamentario y como miembro di e comunidad aki, mi ta keda comprometi pa sigui conscientisa y percura cu Gobierno ta pone bienestar di nos muchanan na prome luga. 

Pero mi kier enfatisa cu legislacion so no ta suficiente. Nos mester di un cambio cultural caminda cada adulto ta tuma su responsabilidad na serio. Ora un mucha comparti algo delicado, nos mester scucha, kere den nan y actua pa busca e proteccion necesario.

E manera cu nos ta trata nos muchanan awe ta determina e calidad di nos sociedad mañan. Un mucha cu ta crece sintiendo su mes protehi, respeta y scucha, ta bira un adulto sigur y un cuidadano cu lo ta feliz y lo aporta na su pais. 

Riba e Dia Internacional di Derecho di Mucha aki, ban renoba nos compromiso. Laga nos sigura cu cada dia ta nan dia, cu nan derechonan ta wordo respeta, y cu nan futuro ta yen di oportunidad y siguridad.

#ShailinyTrompLee #liderazgocucurason #derechodimucha #WorldChildrensDay