Tin hopi hende ta alegra den caida di nan prohimo, bisando drechi pe, su boca ta grandi, masha tempo mi a mira e cos ta bini, y hopi palabra mas cu ta haci dolor cu hende no por imagina nan mes.
Pero Kico Bijbel ta bisa di esaki?
Rumannan si un hende wordo soprendi den cualkier delito, boso cu ta spiritual , restora un hende asina, den un spiritu di mansedumbre, cada un wak su mes,pa boso no wordo tenta.(Galationan 6:1).
Den carni of carnalidad, hende no por wordo restora, cu tiramento di cos na cara, den insulto, den pleito, den hipocrecia, den falsedad, den e pensamento cu ami ta miho cu bo (Lucas 18:9-14) nada no ta wordo drecha, pero ora nos pone nos mes den lugar di esun cu a cay , nos ta sa di pordona, mescos cu Dios a pordona nos.
Dos ta miho cu un, pasobra nan tin un bon pago pa nan trabao,pasobra si un di nan cay,esun lo lanta su companjero.Ma ay di esun cu cay ora no tin ningun hende pa lante.( Eleclesiastes 4:10).
Pasobra un hende husto ta cay siete bes y ta lanta atrobe,ma e malbadonan ta trompeca den tempo di calamidad.( Proverbionan 24:16).
E cuenta di haci cherche cu dolor di hende, no ta bunita den bista di Dios, pasobra Dios ta manda nos stima nos prohimo, esey ta nifica stima tanto ora cos ta bon pa hende y ora cos ta malo pa e persona.
Stime den su fiesta, pero tambe stime den su dolor, aplaudi crecemento, pero keda para hunto cu e persona ora cos no ta bayendo bon cune.
Hopi biaha den un matrimonio, ta ora dificultad drenta bida e ora ey e amor berdadero ta sali na cla,wak bon den historia di Job e casa di Job no por a deal cu e situacion ( Job 2:7-10).
Pesey den un matrimonio ta bini prueba pa stabilisa e matrimonio, pasobra matrimonio no ta solamente relacion sexual, cas bunita, auto bunita, yuinan bunita, bon trabao etc, pero bida ta presenta su buelta pa hende sinja respeta otro y sa di berdad cu nan tey pa otro.
Un di e puntonan hopi importante den un matrimonio ta ora un pareha sa di pordona otro, pero pordona otro di berdad, sin condicion, manera Dios a pordona nos tur, no ta pasobra un hende a haci un fout e tin di keda esclavo di su pareha pa resto di su bida,pasobra e a haci fout.
Pasobra palabra di Dios ta bisa: Cu si nos confesa nos pica,E ta fiel y husto di pordona y libra nos di tur inhusticia.( 1 Juan 1:9)
Especialmente pa matrimonio, aunke tin hopi cu tin miedo di hacie Senjor ta bisa den Santiago 5:16: Pesey confesa boso picanan un na otro, y haci oracion un pa otro, pa boso wordo cura, e oracion efectivo di un hende hustu por hopi.
Tur e cosnan aki ta stabilisa matrimonio, y diabel ta keda bergonsa ora entre e homber y e muher tin e confiansa ey di confesa un na otro y pordona otro, y haci oracion un pa otro, pasobra eynan e enemigo ta wordo venci pasobra ora e a mira gera na caminda, Senjor a sembra pas.
Den nos cas, nos yuinan por comete un error, pero mescos cu educacion ta cuminsa den cas restauracion tambe mester tuma lugar den cas, pasobra si un hende su hendenan di cas no por restora su situacion serca ken e ta bay?
Senjor trece bo restauracion den cada hogar pa medio di bo palabra.
Sinceramente, Pastor Marcel Balootje
