Futbol Division Honor Plata

Den un tremendo wega caminda tawata tin un yobida di gol, y cu dos rival cu a bai cabez cabez, golpi pa golpi, e mucha nan di angochi, Sportboys ta propina Santa Fe su promer derota di e di dos edishon di Division Honor copa plata y ta sacudi e tabla di posishon despues di dos fecha. Sportboys ta debutando den Copa Honor Plata. Santa Fe tawata favorito pa gana e wega aki, mirando e calidad di jugador nan cu nan tin y nan amplio experiencia den Division Honor. Pone riba dje cu Santa Fe tin e delega di tur e team nan di Santa Cruz y no a perde cu un di nan den basta tempo, tur cos tawata mustra un “walk in the park” pa e mucha nan dirigi pa Gerald De Freitas. Es mas den Debut ta strika su promer 3 punto cu un goleada di 6-2 riba Caravel. Cos tawata mustra complica pa Sportboys, pero E muchanan di angochi a bin cu intentshon serio e anochi aki. Cu dos gol den e promer 30 minuut di Jose Galvis Billardo, Sportboys ta tuma un ventaha amplio, pero net promer cu half time Hugo Robert ta corta ventaha pa medio di un penalty y asina half time ta bai aden 2-1 na favor di e Mucha nan di Angochi. Na di 61 minuut Richmar Kelly ta haci e wega 3-1 pa Sportboys y cos tawata mustra  cu e wega tawata riba ice, pero Santa Fe ta recshona den bon forma y cu otro gol di Hugo Roberts na di 67 minuut y un di Yong Heng He na di 74 minuut Santa Fe ta logra empata e wega na 3 pa banda. Cu biento na nan favor Santa Fe a sigui preshona buscando e gol di victoria, pero ta Bryan Susebeek di Sportboys cu na di 89 minuut ta pone e bala den net pa haci e wega 4-3 y duna e muchanan di Angochi e victoria importante aki. Sigur un victoria historico ya cu ultimo biaha cu Sportboys a gana un team di Division di Honor, ainda Sr.Nelson Oduber tawata promer minister. Cu e victoria aki Sportboys ta yega 4 punto y ta pasa ocupa e di dos lugar lagando Santa Fe na di 3 lugar. E Muchanan di Angochi a tumba un team grandi y si nan kier bira un berdadero “Giant Killer” nan lo mester pasa un otro prueba grandi diadumingo awor ora nan topa e Speransa berde di Savaneta, S.V. La Fama. E oncena di Savaneta ta bin di dos victoria grandi marcando un total di 18 gol den su promer dos wega nan y ta mustra mas manera un bulldozer berde cu motor di Ferrari. Pero bala ta rondo y un invitashon ta bai na e bario di Angochi y Santa Cruz en general pa diadumingo awor baha bai Noord na Compleho Deportivo Frans Figaroa caminda cu pa 8 or di anochi,Sport boys ta topa SV La Fama.

LEAVE A REPLY

Please enter your comment!
Please enter your name here