Dialuna tardi, Prome Minister mr. Mike Eman como e minister encarga cu proteccion di nos Naturalesa y Medio Ambiente, a ricibi un delegacion di Stichting Happy Cadushi Nature Reserve, kende a presenta un peticion pa declara oficialmente un area di Matividiri como un area di naturalesa protegi.
Durante e encuentro, e fundacion a entrega un informe actual di diferente flora y fauna den Rooi di Matividiri y su entorno, cu ta mustra cu e area tin un rikesa natural hopi excepcional. Segun e investigacion mas reciente, Matividiri ta conta actualmente cu 98 especie registra, consistiendo di 59 especie di flora y 39 especie di fauna. E representantenan di e fundacion a destaca cu esaki ta pone Matividiri como un di e area cu e mayor diversidad biologico entre e areanan natural cu a yega di inventarisa na Aruba te cu dia di awe. Entre e descubrimentonan nobo ta varios especie di mata y insecto cu anteriormente no tabata registra den e area. Stichting Happy Cadushi Nature Reserve a un biaha mas urgi cu un peticion cu originalmente a presenta na 2022, argumentando cu Matividiri ta ocupa un posicion strategico den un area ecologico entre Rooi Prikichi y Parke Nacional Arikok. Segun e fundacion, proteccion oficial di e area lo contribui significativamente na e esfuersonan pa conserva biodiversidad y fortalece e areanan natural di Aruba. Durante e reunion, e representantenan tambe a expresa nan aprecio p’e diferente iniciativa cu Gobierno ta impulsando pa restaura y protege nos naturalesa, manera e proyectonan di reforestacion na Spaans Lagoen, e berm di Henny Eman Boulevard rond di aeropuerto y e recientemente e proyecto di Aima Coa den Parke Nacional Arikok.
Prome Minister Eman a gradici e fundacion pa nan dedicacion y compromiso continuo cu conservacion di naturalesa. Esaki ta enfatisa e participacion di nos comunidad ta indispensabel pa logra un Aruba mas sostenibel y resiliente. E cooperacion entre Gobierno y e organisacionnan ambiental ta importante pa sigui traha hunto na beneficio di nos naturalesa, medio ambiente p’e generacionnan den futuro.
