Stichting Musica kier duna oportunidad na henter pueblo di Aruba pa asisti Aruba Caiso & Soca Monarch 2023.
Kaarchinan pa e anochi final, dia 28 di januari 2023 na Carnival Village, ta disponibel na Citgo Boulevard, Palm Beach, Essoville y tambe via e servicio di Pay.AW. Entrada pa e festival ta costa Awg. 50,-.
Sinembargo, e organisacion ta consciente cu esaki ta un festival na unda henter famia ta sali hunto pa bai apoya nan participante preferi of pa simplemente disfruta di e food court, topa conocirnan y goza di e dushi ambiente.
Pa e motibo aki Stichting Musica ta presenta su ORA LOCA, na unda cu por cumpra tickets na prijs reduci of pakete pa grupo y famia na un suma atractivo. E prome ORA LOCA lo tuma lugar riba DIAMARS, 17 DI JANUARI entre 4 – 5 PM, exclusivamente via e servicio di Pay.AW. Durante e orario aki, tickets lo ta obtenibel pa solamente 35 FLORIN pa kaarchi.
Riba e Facebook page di Stichting Musica por sigi tur anuncio y informacion relata na e festival y e ORA LOCA. Un y tur ta cordialmente invita pa haci uzo di e specials, pa por asisti y engrandece e festival di mas dushi di nos isla, Aruba Caiso & Soca Monarch!
Stichting Musica ta gradici Setar NV, Ban Serio (un iniciativa di Aruba Tourism Authority), Aruba Bank, Aruba Airport Authority, Balashi, Telearuba y Elite Productions & Entertainment pa haci Aruba Caiso & Soca Monarch 2023 posibel.
