Shonnan, amantenan di “cutting edge” domino, e diasabra awor ta bay tin e tan spera sambombaso di fin di aña aya n’e palacio di pega piedra, e mundialmente famoso Domino Square Garden! Si señores pegadores y pecadores, diasabra 21 di december, cuminsando pa 7’or di anochi, tur e amantenan di domino cuta frecuenta otro henter aña lo haya nan chens un biaha mas pa demostra ken ta ken na mesa di domino.
Shonnan, den “wandelgangen” tin papia cu “blauwe vogel” a trece nada menos cu dr. Ronald “Hollandse Nieuwe”, kende hunto cu dr. Tico Dirksz a sali sub-campeon 2023 categoria veterano, for di tera friu pa bin participa n’e evento anual aki y purba bay cu campeonato! Tambe caya ta papia cu e campeonnan den categoria veterano, esta Tico “The Grey Fox” Velasques y Ronny “Hanzue” Tromp, lo t’ey presente pa defende nan campeonato!
Y no esey so, señores, den categoria “Nos Futuro” tin papia cu e guy grandi di aña pasa a drenta gym prepara su mes pa atrobe bira campeon! Jeff Ruiz hunto cu Mark Yarzagaray, campeonnan di 2023, lo t’ey atrobe pa bay cu e trofeo! Aña pasa nan a “edge” Jeremy cu “Chicks”, pero caya ta papia cu e biaha aki cos lo por bay den e trend di “boltermento”! Asina ta shonnan, bini un bini tur, entrada pa pueblo ta completamente gratis y durante halftime e pasapalonan lo core totalmente por nada diasabra awor 21 di december, cuminsando pa 7’or di anochi, aya n’e “steenplakkerij” n’e grens entre Kudawecha y Calabas, e famosisimo Domino Square Garden! Yegaaa!
