E grandioso y prestigioso palacio di pega piedra, esta Domino Square Garden aya net n’e grens entre Kudawecha y Calabas, ta bay habri aña 2025 cu e prome sambombaso den domino di mondi diasabra awor, 18 di januari, cuminsando pa 8’or di anochi, ora cu e guynan suav di Team Biba Lekker enfrenta nan “nemesis” Team Snor lidera p’e enigmatico y flamante Nelson “Snor” Perez.
Si shonnan amante di domino estilo “fast & furious”, e temporada di 2025 lo bay habri c’un tiro grandi ora cu e ekipo di Team Snor, kendenan a raspa duro den 2024, bin enfrenta e militancia di esnan di “la dolce vita”, e guynan di “waarom vandaag als het morgen ook kan”, nada menos cu e gang di Biba Lekker bou guia di lider Trimonus Maximus!
Shonnan, e ambiente p’e anochi aki ta hot! Desde un par di siman caba esnan cu sa kico t’e dushi gezelligheid di Domino Square Garden ta sclama ki dia e batayanan ta cuminsa pa caba. Wel, fanaticada no tin cu warda mas ya cu diasabra awor e prome bom lo rementa n’e mundialmente famoso Domino Square Garden! Manera semper, entrada pa pueblo en general ta completamente gratis y durante halftime e pasapalonan lo skeiro rond totalmente por nada! Asina ta, bini uno bini tur, diasabra awor 18 januari, cuminsando desde 8’or di anochi, n’e encuentro sensacional aya n’e palacio di pega piedra entre Team Snor y Biba Lekker DT. Yega!
