Epicentro a wordo registra den region di Choco. Ciudadnan manera Pereira, Cali y Quibdo ta reporta e impacto mas severo di destruccion structural.
Un teremoto masha fuerte y destructivo di magnitud 7.4 a sacudi e parti west y central di Colombia dialuna mainta, 10 di augustus 2026, pa 7:34 AM (ora local). E sismo, cual e Servicio Geologico Colombiano a describi como e mas fuerte registra den e pais den e ultimo decada, a laga te awor un cifra lamentabel di mas di 200 persona fayeci, mas di 1.300 herido, y miles di persona declara desapareci o atrapa bou di e escombronan.
E epicentro tabata localisa cerca di e comunidad di San Jose del Palmar, den e departamento di Choco, cu un profundidad di mas di 90 kilometer. Pa via di e profundidad aki, e Centro di Alerta di Tsunami di Pacifico a descarta cualkier minasa di tsunami pa e costanan. Sin embargo, e forsa di e temblor tabata asina grandi cu el a wordo sinti fuertemente te na Ecuador y Panama, y den e capital Bogota, unda miles di habitante a sali na careda riba caya den panico.
Situacion critico na Pereira y Cali
E impactonan mas severo a wordo reporta den e region west di e pais, specialmente den e departamento di Risaralda y Valle del Cauca. Na Pereira, e ciudad mas afecta, e autoridadnan local a confirma cu mas di 77 persona a perde nan bida debi na e colapso di edificionan y casnan. Na Cali, e di tres ciudad mas grandi di Colombia, e alcalde Alejandro Eder a confirma e colapso di mas di 30 edificio, caminda equiponan di rescate ta trahando incansablemente pa saca e victimanan. Fuera di esey, e Hospital Universitario di Cali y e Aeropuerto Matecaña di Pereira tambe a sufri dano structural grave.
Na e departamento di Choco, e Gobernadora Nubia Carolina Cordoba-Curi a informa cu tin destruccion masivo y decenas di herido den e capital Quibdo, mientras cu e Servicio Geologico a registra mas di 50 replica di e sismo principal.
Aeropuertonan sera y contesta di Gobierno
Pa motibo di e emergencia, e autoridadnan di aviacion a suspende temporalmente e operacionnan den varios aeropuerto di e region, incluyendo Pereira, Manizales, Quibdo, Armenia, Cartago y Buenaventura, pa evalua e pistanan y e terminalnan cu a sufri destruccion interior.
E presidente di Colombia, Abelardo de la Espriella, a declara e estado di desastre nacional y a asumi e liderasgo di e Puesto di Mando di Emergencia. “Boso no ta boso so. Estado ta presente y actuando pa asisti tur e victimanan,” e mandatario a declara.
E comunidad internacional, incluyendo paisnan bisinja y organisacionnan di rescate, a cuminsa manda ayudo humanitario inmediato pa apoya den e labornan di busqueda di desaparecidonan y reconstruccion di e zonanan afecta.
