Cu inicio di e aña escolar nobo acercando, hopi famia ta den pleno preparacion pa cumpra uniform, sapato, tas, material escolar y tur otro articulo cu nan yiunan tin mester pa bolbe klas.
Parlamentario Jennifer Arends-Reyes ta enfatisa cu, aunke e periodo aki ta uno di entusiasmo pa muchanan, pa hopi mayor e ta trece un presion financiero considerabel.
“Como mama y tambe como profesional cu ta bin for di mundo di enseñansa, mi conoce e realidad. Inicio di un aña escolar ta trece alegria y expectativa, pero tambe hopi gasto,” Arends-Reyes a declara.
Pa e motibo aki, e parlamentario ta considera e sosten financiero adicional anuncia pa Gobierno di Aruba un medida necesario y importante pa yuda e famianan cu mas tin necesidad.
Durante un conferencia di prensa, Prome Minister mr. Mike Eman y Minister di Salud Publico, Asunto Social, Cuido di Adulto Mayor y Maneho di Adiccion, drs. Melvin Wyatt-Ras, a anuncia diferente aumento den sosten social. E medidanan ta basa riba e costo di bida y e necesidadnan cu famianan ta enfrenta diariamente.
Pa Arends-Reyes, politica social mester traduci den medidanan cu ciudadano realmente por sinti den su bida diario.
“Nos por papia di cifra, crecemento y progreso, pero na final e pregunta importante ta: ciudadano ta sinti esaki den su cartera y den su cas? Desaroyo di un pais mester yega tambe na mesa di e famia y brinda sosten unda e necesidad ta real.”
E parlamentario ta enfatisa cu sosten pa inicio di aña escolar no ta solamente un ayudo financiero, sino un inversion directo den igualdad di oportunidad.
“Mi ta pensa riba e mucha cu ta entusiasma pa drenta klas cu su uniform, tas y materialnan prepara. Ningun mucha mester sinti berguenza simplemente pasobra situacion financiero di su famia ta dificil. Un bon comienso escolar mester ta posibel pa tur mucha.”
Segun Arends-Reyes, Gobierno tin responsabilidad di sigui evalua costo di bida y adapta sosten social na e realidad cu ciudadano ta enfrenta.
“Cada sosten adicional ta conta, pero nos no por para aki. Nos mester sigui scucha famianan, identifica unda e presion ta mas grandi y busca solucionnan concreto cu ta brinda ciudadano mas espacio den su presupuesto.”
Finalmente, Arends-Reyes ta desea tur mucha, mayornan y personal di enseñansa hopi exito cu e preparacionnan pa inicio di e aña escolar nobo.
“Mi deseo ta cu cada mucha por drenta su klas cu entusiasmo, confianza y dignidad. Ora nos crea oportunidad pa nos muchanan, nos ta fortalece famia. Y ora nos fortalece famia, nos ta fortalece Aruba,” Arends-Reyes a conclui.
