Parlamentario drs. Shailiny Tromp-Lee (MEP):
Tremendo noticia cu AAA ta bay inicia cu e proyecto Gateway 2030 cu lo crea mas di 200 cupo di trabou directo!
Recientemente Aruba Aitport Authority (AAA) a anuncia cu e Proyecto Gateway 2030 ta bay continua. Memey di un pandemia, caminda ta trahando incansablemente pa domina e virus y poco poco yega na un grado di normalidad bek cu nos tur ta desea, noticianan asina ta loke nos kier tende of lesa di nan.
Proyecto Gateway 2030 ta trata di un inversion di 140 miyon dollar cu lo crea mas di 200 cupo di trabou directo. Ademas e proyecto aki sigur ta aporta grandemente na e calidad di turismo cu nos kier ofrece nos bishitantenan. Ta trata di un proyecto hopi importante cu lo bay atende cu limitacionnan di capacidad cu Aeropuerto Internacional Reina Beatrix tin y cu lo tene cuenta cu e experiencia cu nos kier brinda nos bishitantenan. Na mes momento AAA lo keda enfoka riba e parti di sostenibilidad. Segun AAA door di Covid nan a para cu e proyecto na 2020 y a cuminsa pensa na ki manera lo bay y lo por ehecuta e Proyecto ambicioso aki. No obstante e pandemia nan a dicidi di continua cu e inversion y ehecucion di Gateway 2030.
Fase 1A di Gateway 2030 ta consisti entre otro di construccion di un sala di ekipahe, implementacion di un sistema nobo pa atende cu ekipahe y ampliacion di e sala di facturacion di Merca. Sigur mi ta aplaudi e decision di ehecuta e fase aki 100% local cu e meta pa apoya nos economia. 100% local kiermen cu e companianan Albo Aruba NV, Bohama Aruba NV, Arubaanse Wegenbouw Maatschappij (AWM), Croon Caribe y CHS Technical Contracting and Trading Company N.V. hunto bou di e nomber ABC Project Venture lo bay ehecuta e Proyecto aki.
Despues di e accion di retiro di personal di AAA memey di e pandemia, toch e decision aki ta un manera pa AAA drecha su imagen den pueblo. Banda cu nan ta manda un señal positivo nan ta aporta grandemente na recuperacion di nos economia, brindando un rosea grandi na e 5 companianan di construccion menciona, cu na nan turno lo bay haci uzo di subcontratista y otro negoshinan. Mi ta spera di curason cu na tur momento ta percura pa nos hendenan local ta e promenan yama pa haya trabou y cu e control debido ta keda realisa pa preveni ilegalidad y cheap labor. Principalmente cerca e subcontratistanan.
Pues un bes mas mi kier felicita AAA pa tuma e decision di sigui cu e proyecto aki y pa a brinda nos un noticia alentador memey di e pandemia. Proyectonan asina ta loke ta bay aporta na recuperacion di nos economia mas liher.
