*Esey ta locual tur hende mester compronde, y nan actitud lo cambia, nan manera di pensa lo cambia, ningun momento bo no por sinti bo mes rechasa of discrimina, pasobra Dios ta stima bo, pasobra bo ta di Dios, bo ta pertenece na Dios, y bo mester biba segun e boluntad di Dios, pa asina bo por mira Dios su bondad wordo realisa den bo bida.

No ta pornada Dios a entrega su Yiu unigenito pa ken cu kere den dj’E no bay perdi , ma tin bida eterno.Ta pasobra E a stima e mundo, pasobra E no kier pa ningun bay perdi pero pa tur yega na arepentimento. Mas ainda nos tin cu corda cu Dios a traha hende den Su imagen y semehansa y a pone su Spirito den nos .

Riba e mundo cada mama ta stima nan yiu, no ta importa con e yiu ta , su mama ta stime, awel mas ainda nos Tata cu ta den cielo ta stima nos, pasobra no lubida cu ta E a forma nos den barica di nos mama, esey ta nifica cu prome cu nos mayornan a mira nos ya Dios tey caba den nos bida.

Ningun hende no tin derechi di kita bida di ningun hende, Dios solamente ta duna y Dios ta tuma, Dios ta doño di tur cos riba e mundo aki, aunke e enemigo kier haci manera e ta doño y e ta logra influencia hende pa nan bay su tras, Dios keto bay ta Soberano.

Ma awor asina Señor, bo Creador ta bisa,O Jacob,y Esun cu ta formabo O Israel. No tene miedo pasobra Ami a redimi bo, Mi a yama bo na bo nomber,bo ta di Mi!.Ora bo ta pasa den awanan lo Mi ta cu bo, y door di ruinan, nan lo no lastrabo bay cu bo. Ora bo ta.cana door di candela, esaki lo no flamabo, pasobra Ami ta Señor bo Dios, Esun Santo di Israel , bo Salbador.( Isaias 43:1-3).

No tene miedo pasobra Mi ta cu bo, no desmaya, pasobra Mi ta bo Dios,Lo Mi fortalese bo, si lo mi yuda bo,si lo Mi sostene bo cu mi man drechi di husticia,( Isaias 41:10).

No recorda e cosnan di pasado,ni keda pensa riba e cosnan cu a pasa caba. Mira Mi ta bay haci algo nobo, awor esaki ta bay sali na cla, boso no ta ripara esey. Lo Mi traha un caretera den tera seco, ruinan den desierto.

Cosnan grandi Dios, ta haci pa nos, pasobra Dios ta stima nos, E a crea nos, homber y muher e a crea nos (Genesis 1:27-28).

Dios su creacion ta perfecto cu diabel a bira envidioso, door di e contacto cu Dios tin cu su creacion, y e a bini y susha e creacion di Dios cu pica,

Pa asina trece un separacion entre Dios y su Creacion.

* Pero Dios den Su inmenso amor a manda Su unico Yiu Cristo Hesus den forma di hende pa derota e e diabel , y asina demostra Su amor pa humanidad, y pesey tur hende cu ta kere den Cristo Hesus tin autoridad pa reprende e diabel, den nomber di Cristo Hesus.

Ta parce manera hopi no ta compronde, ni reconoce e redencion cu a tuma lugar na crus di Calvario, caminda e sanger di Cristo Hesus a wordo derama pa pordon di nos pica.

Esun cu ta kere den eYiu tin bida eterno, ma esun cu no obedece e Yiu lo no mira bida,ma e furia di Dios lo keda riba dje. ( Juan 3:36).

Sinceramente Pastor Marcel Balootje.