ORANJESTAD – Recientemente un delegacion di Aruba lidera pa Minister demisionario di Turismo, Danguillaume Oduber
hunto cu CEO di Aruba Tourism Authority (A.T.A.) Ronella Croes, Cruise Manager Mario Arends y di parti di Aruba Ports
Authority (APA) Director Marc Figaroa, a biaha bay Miami pa participa den diferente reunionnan clave pa nos destinacion pa
loke ta trata turismo crucero.
Entre otro a reuni cu ehecutivonan di Royal Caribbean Cruise Lines (RCCL) cual ta un di e lineanan di crucero cu ta produci
mas hopi turista crucero pa nos destinacion. Esaki sigur ta di importancia pa Aruba su industria di turismo.
E contacto entre e lineanan crucero y e destinacionnan cu nan ta scoge pa bishita ta importante, pa delinea den cua direccion
mester desaroya. Pa Aruba e preparacion y inversionnan ta necesario pa asina fortifica e bentaha competitivo cu nos isla ta
goza di dje. Un bon preparacion ta percura cu nos isla por ricibi barconan di crucero cu mas turista cual na su turno ta
bentahoso pa nos economia.
Durante e reunionnan, ehecutivonan di e lineanan crucero a mustra di tin hopi confiansa den Aruba. Tin interes di nan parti pa
inverti den e facilidadnan di nos waf pero tambe den e proyecto di Port City Oranjestad cual tin como meta pa renoba e waf
actual. Aruba Ports Authority a duna un update riba e inversionnan y a indica debi cu na e COVID-19 a posponi algun
proyecto, pero lo continua cu esakinan pronto.
E pandemia mundial a percura cu awo cruceronan ta nabega cu un itinerario ahusta. Cada crucero ta adapta na e protocol di
Covid-19 segun e ta wordo implementa. Pa tal motibo, e retonan den otro aereanan den Caribe por trece barconan crucero
adicional pa Aruba di loke ta trata e resto pa aña 2021.
Sinembargo pa añanan 2022 y 2023 a wordo papia cu Aruba por spera di ricibi barconan manera e Quantum Class y e Oasis
Class di RCCL cual ta e barconan mas nobo di e linea crucero aki pero desde 2019 tambe ta wordo considera como e
barconan crucero mas grandi di mundo.
Turismo crucero a bira mundialmente un parti esencial den e industria di turismo cu globalmente ta produci un average di US$
29.4 biyon pa aña y mas cu 19 biyon pasahero.
Resultado di BREA (un compania internacional cu ta midi cuanto turistanan crucero ta laga atras den economia) ta mustra
den nan raport di 2018 cu e turistanan ta laga un promedio di US$ 121.94.- pa persona pa cada destinacion atras.
Pa Aruba na aña 2019 un total di 823.001 tursitanan crucero a bishita nos isla riba un total di 324 diferente barconan crucero.
Ta bon pa menciona cu pa 2021,lineanan di crucero manera RCCL (Royal Caribbean Cruise Lines) y CCL (Carnival Cruise
Lines) ta registrando gradonan di satisfaccion mas halto bao nan pasaheronan compara cu prome cu e pandemia. Alaves e
cantidad di placa cu e pasaheronan crucero ta gastando den e destinacionan tambe a subi.
Ministerio di Turismo, A.T.A. y APA lo continua hunto pa haci esfuersonan pa recuperacion di nos turismo crucero.
Ta sumamente importante pa nos tur sigui e protocolnan manera stipula door di diferente instancianan. Pasobra ta hunto nos
lo vence pa nos isla y su turismo por sigui florece.
