E walkout reciente di e miembronan di Recherche y e sindicato policial ta manda un señal alarmante cu no por ignora. Pa lider di fraccion di PPA, Eduard Pieters, e situacion actual den cuerpo policial no a surgi di un dia pa otro. Segun Pieters, Parlamento di Aruba a adverti gobierno mas di un aña pasa y a duna instruccion cla pa actua.
“Nos ta lamenta profundamente e situacion penoso cu aworaki ta reina den cuerpo policial,” Pieters a declara. “Pero e pregunta cu pueblo mester haci ta: con nos a yega te aki?”
Parlamento a papia, gobierno no a actua!
Pieters a recorda cu na maart 2025 Parlamento di Aruba a aproba un mocion unanimamente pa gobierno tuma accion concreto pa fortalece cuerpo policial. Entre e medidanan tabata implementacion di bodycam y dashcam, e cambionan den legislacion pa permiti uzo di e hermentnan aki y mehoracion di e condicionnan di trabou p’e polisnan.
“Un aña despues, nos ta puntra: unda e bodycamnan ta? Unda e dashcamnan ta?” Pieters a cuestiona. “Parlamento a duna un instruccion unanime. No tabata cuestion di partido politico. Tur parlamentario a para tras di esaki, despues di e suceso tragico y lamentabel di e hoben Lanoy.”
PPA a propone inversion den seguridad
Segun Pieters, PPA no solamente a critica gobierno, pero tambe a presenta opcion di solucion concreto durante tratamento di presupuesto. Fraccion di PPA a propone un amienda, unda lo genera mas ingreso pa pais Aruba, via un ‘pardonregeling’ pa regularisa e personanan indocumenta. Segun e calculacionnan presenta e tempo ey, e medida por a genera aproximadamente Awg 22.7 miyon. Di e cantidad aki, PPA a propone pa destina:
- Awg 6.5 miyon pa personal adicional necesario;
- Awg 7.5 miyon pa ekipo y material.
“Cu e amienda aki por a pone placa riba mesa pa tasers, bodycams, dashcams, bulletproof vests y otro material cu cuerpo policial ta pidi pa hopi tempo caba,” Pieters a splica.
Coalicion a vota contra
Segun e parlamentario, a pesar di e necesidadnan evidente den cuerpo policial, e amienda di PPA no a haya respaldo di e partidonan cu ta sostene e coalicion.
“Awor nos ta mira e consecuencianan,” Pieters a declara. “Nos no ta culpa e polisnan, nos no ta culpa e miembronan di Recherche ni e directorado di KPA, ni SPA. Mi ta condena e decisionnan politico cu a haci y no haci uzo di e oportunidad pa inverti den seguridad.”
Aruba no por sigui reacciona despues di un desaster
Pieters a adverti cu gobierno no por sigui warda pa un tragedia nobo bolbe pasa, pa despues actua. “Dios laga cu nada pasa, pero nos no por sigui goberna Aruba wardando riba un otro incidente grave, prome cu nos core busca bodycam, dashcam, material y recurso humano pa KPA. Gobierno mester actua proactivamente, no despues cu problema a explota.”
Fraccion di PPA a anuncia cu lo sigui monitoria e situacion di cerca y ta dispuesto pa reuni cu sindicato y alto mando policial pa busca solucion structural.
“Nos no ta busca problema. Nos ta busca pa evita problema. P’esey nos a presenta e proposicionnan aki un aña pasa.”
