Grandi y chikito ta forma un solo pueblo, sin importa nos diferencia. Uni pa un solo meta: un Aruba limpi. Cu e mensahe aki, gobierno a duna inicio na e accion nacional Cuida Aruba dia 25 di juli. Na Mabon, un cantidad grandi di boluntario, habitante di bario, militar di Marina Real y representante di diferente compania y organisacion manera ALBO, e asociacion di contratista den construccion WAB a uni forsa pa haci e area deportivo y recreativo di e bario limpi. E sitio aki tabata den un estado di abandono pa varios aña, pero awor e ta haya un proposito nobo.
E boluntarionan a piki boter, bleki, glas y otro tipo di sushi. Nan a corta mata y yerba grandi, haci e areanan limpi y prepara e area pa futuro trabounan di mantencion cu lo haci den e facilidadnan. E meta ta pa nos muchanan, nos hobennan y e adultonan por bolbe haci uzo di e facilidadnan pa baseball, softball, futbol y basketball. Presidente di Comision di Bario Mabon, Astrid Vries, a expresa satisfaccion cu e accion. Segun Vries, e bario a pasa hopi tempo den abandono y e comision a sigui pidi atencion pa e situacion. Awe, e habitantenan por mira un cambio concreto.
Comandante Henk Buijs di Marina Real na Marinierskazerne Savaneta a expresa cu ta importante pa nan ta presente y traha hunto cu comunidad. Segun Buijs, suficiente militar a participa pa por ehecuta e trabounan necesario, cu ta inclui colecta sushi entre otro boter, bleki y glas, como tambe corta mata y haci e tereno limpi. E comandante a destaca e importancia di mantene contacto cu e habitantenan di bario y a gradici e companianan cu a facilita makinaria pisa, locual a permiti nan haci mas trabou. Buijs a califica e iniciativa di Prome Minister Mike Eman como uno excelente y a indica cu Marina Real ta contento di por sostene e accion y contribui na un Mabon y Aruba mas limpi.
Mabon tin e ambicion pa bira uno di e bario mas limpi di Aruba. E participacion di nan habitantenan hunto cu comercio , gobierno y Marina Real ta mustra cu cooperacion por trece resultado. E accion na Mabon ta resalta cu ora comunidad uni, abandono por haci luga pa progreso. Cada ciudadano por duna su mihor na su cas, den su bario y rond isla. Aruba ta di nos tur. Ban cuida Aruba.
