Hesus ta spierta nos den Mateo 26:41 bisando: Keda vigila y haci oracion, pa boso no cay den tentacion, e spirito ta boluntario , ma e carni ta debil.
Apostol Pablo ta bolbe recorda nos den Efesionan capitulo 6:10-12: Finalmente, sea fuerte den Señor y e forsa di Su Poder. Bisti e armadura completo di Dios, pa boso por para firme contra e trampanan di diabel. Pasobra nos lucha no ta contra carni y sanger,sino contra e gobernantenan, contra e podernan,contra e forsanan,mundial di e scuridad aki, contra e forsanan di maldad,den e lugarnan celestial.
Ora Lucifer a rebeldia contra Dios hunto cu un tercera parti di angelnan, Dios a saca nan for di cielo, pero nos no sa cuanto nan tabata, pero nan mester tabata hopi, pa causa tanto maldad , inmoralidad y abominacion riba mundo. Djis tira un bista rond di nos awendia y wak kico ta sosodiendo, pesey nos bida di oracion mester ta fuerte.
Pasobra maske nos ta cana den carni,nos no ta bataya segun carni,pasobra e armanan, cu nos ta bataya cune,no ta carnal ma poderoso den Dios,pa basha e fortinan abao. Y pa destrui speculacion, y tur arogancia,cu ta wordo lanta contra e conocemento di Dios,hibando den cautiverio,tur pensamento,pa haci nan obedecido na Cristo.Y nos ta cla pa castiga tur desobediencia unabes cu boso obediencia ta completo.( 2 Corintionan 10:3-6)
Nos tur ta mesun vulnerabel dilanti di e trampanan di e enemigo, pesey ta importante pa nos hiba un bida di oracion ferviente, pasobra solamente asina nos por vence e tentacion y atake cu ta bini contra nos bida.
Den e nomber di Cristo Hesus,nos tin autoridad y poder pa reprende e enemigo, pa corre cune for di nos bida, cas, matrimonio y famia.
Pero tambe nos tin di tende cuenta cu cosnan cu ta stroba nos oracion di wordo scucha:
!Pidimento cu motibo robes, pa placer y orguyo ( Santiago 4:3).
!Idolatria ( Eekiel 14:3-5).
!Falta di pordon ( Marco 11:25).
!Pica no confesa (Isaias 59:2).
!Trato den relacion matrimonial ( 1 Pedro 3:7).
!Falta di Fe( Santiago 1 :5-8).
Tambe nos mester tene bon cuenta pa nos amistad cu e sistema di mundo aki no prevalece riba nos amistad cu Dios, pa nos no ta ocupa den cosnan di mundo cu ta envolvi nos mes den arogancia, orguyo y inmoralidad, y asina distancia nos for di Dios.
Un factor masha importante den nos bida di oracion ta cu nos mester tin un curason cu ta pordona, y lubida, laga los, y no wanta hende na nos curason, cu ta trece odio y amargura, pasobra e palabra di Dios ta bisa den Hebreonan 12:14: Apira pa tin pas cu tur hende y santificacion, sin cual hende lo no mira Señor.
David a bisa den Salmo 66:18: Si mi a warda maldad den mi curason,Señor lo no a tendemi, ma di berdad Dios a tende E a paga atencion na e bos di mi oracion.
Nos bida di oracion ta nos comunicacion cu Dios, y no ta bon pa nos laga nada, tampoco ningun hende interveni den nos bida di Oracion na Dios.
Ta oracion ta locual ta bay scapa nos den e temponan trabahoso den cual e mundo ta pasando y ainda falta locual tin cu bini.
Pesey den Lucas 21:34 ta para scirbi: Tene cuidao pa boso curason no ta carga pa causa di paranda y buracheria, y preocupacion di bida, y e dia ey no bin diripiente riba boso manera un trampa.
Nos oracion ta hopi importante pa libra nos di tentacion y maldad.
Sinceramente, Pastor Marcel Balootje.
