Cu enfoke pa traha pa Aruba meymey di e lama turbulento cu ta afectando Aruba y henter nos planeta

Ya diaranson 20 di october, nos ta na un luna cu Gabinete Wever-Croes II a huramenta pa e siguiente periodo di gobernacion. Un coalicion solido y firme a wordo forma entre Partido Movemiento Electoral di Pueblo MEP y Partido Raiz pa sigui enfrenta e retonan grandi cu nos pais ta pasando aden. Pa Prome Minister Evelyn Wever-Croes, ta un honor grandi pa sirbi nos pueblo pa di dos biaha como Prome Minister.

Pueblo di Aruba a vota pa un coalicion y nos mester respeta esaki y dun’e su balor. Un coalicion na unda cada Partido ta sirbi y traha cu sinceridad, transparencia, colegialidad, creatividad, pasion y diciplina pa logra lo maximo pa nos pais. MEP y RAIZ un luna pasa a tuma e timon di Gobernacion pa traha pa Aruba meymey di e lama turbulento cu ta afectando no solamente Aruba pero henter nos planeta. Tur pais na mundo na e momentonan aki ta para dilanti retonan grandi; pa sigui proteha y salba bida y alaves rescata economianan y crea cuponan di trabao. Un tarea grandi cu gobiernonan rond mundo tin cu sigur no ta facil.

“Despues di un luna di gobernacion, Gabinete Wever-Croes a cumpli cu loke pueblo a pidi, dus un coalicion. Hunto cu nos partner nobo di coalicion, Gobierno ta pone e enfoke pa Aruba riba recuperacion,” Prome Minister a enfatisa.

Prome Minister a remarca cu den cualkier constelacion di gobierno, e enfoke lo mester ta recuperacion economico y recuperacion total di e pais. “Y aki nos kier a mira un partner cu no solamente lo mira riba e situacion prome cu Covid pero un partner cu hunto ta bay adelanta riba e situacion prome cu Covid. Siña e lesnan cu nos mester a siña prome cu covid y mehora loke por mehora. Haci Aruba mas fuerte, mas resiliente pa si un siguiente crisis bin nos por wante miho”.

Den esey, Prome Minister a accentua, Partido MEP y Partido RAIZ tin metanan comun pa concentra riba e recuperacion di nos pais pero poniendo e enfasis riba e ser humano, riba e personanan cu a sufri hopi den e periodo tras di lomba y merece miho. Esey ta e acuerdo di gobernacion cu tur integrante di Gabinete Wever-Croes a yega na dje.

“Manera JF Kennedy a yega di bisa: ‘Partnership no ta un postura pero un proceso continuo cu ta crece mas fuerte y efectivo cada aña segun nos ta traha hunto pa e causa comun’. Y ta e base aki di solidaridad patriotico, nos ta poniendo den practica den e gobierno di MEP – RAIZ. Aruba tin cu bira un pais resiliente, sigur, innovativo, sostenibel y feliz pa biba. Pueblo por tin pleno confiansa cu hunto, paso pa paso nos atencion completo lo ta pa supera e olanan di e lama turbulento di e temponan aki. Pueblo por tin confiansa cu e coalicion aki di MEP y RAIZ lo sigui traha cu respet pa otro y integridad pa logra e progreso, bienestar y felicidad cu nos pueblo ta anhela y merece. Aruba mester di nos tur”, Prome Minister Evelyn Wever-Croes a expresa.

LEAVE A REPLY

Please enter your comment!
Please enter your name here