Awe dia di Betico, nos ta recorda e hecho cu nos Libertador a wordo tira riba veld di Winston. Tradicionalmente MEP ta tene su parada di auto riba e diadomingo promer cu eleccion y esaki tambe tabata e caso dia 24 di april 1983. E parada manera custumber a pasa den tur bario di Aruba y caminda e hendenan tabata para canto di caminda cu bandera saludando e fila. Pueblo tabata contento y awe den feliz memoria Betico Croes tabata para manera custumber riba e jeep di Aiky Croes.
Na final di e parada, na yegada di veld di Winston, polisnan tabata manda e jeep subi e veld locual a sosode tambe. Na e momento ey un van di polis a core pasa banda di e veld pa blokea e pasada. Un polis (polis Libier) a baha cu pistool den man y ora cu Betico a puntr’e kico ta su intencion, dos tiro tabata e contesta : Uno di advertencia y e otro a traspasa e curpa di Betico y ta perfora su pancreas y su
intestinonan. Esnan cu a acompaña Betico den e jeep a lant’e for di suela sin conocimento y a hib’e hospital.
Como cu e parada tabata para, masha poco hende a presencia e tiramento aki.Ora cu mas y mas hende tabata yegando e sitio, e multitud a cuminsa lanta contra e polisnan.
Mientras tanto e atencion a cuminsa cambia den preocupacion pa e estado di Betico y e multitud a cuminsa dirigi su mes pa hospital. E pueblo tabata conmovi pa loke a sosode cu su lider. Un tension grandi tabata reina y e situacion tabata explosivo. Nos pueblo sinembargo a demonstra un civismo enorme y no a comete actonan di destruccion. Tur actividad politico a ser para. Un alivio grandi a pasa den pueblo ora cu Betico a papia for di hospital na television, pidiendo su pueblo trankilidad y pa bay vota su diabierna siguiente. Despues di algun dia Betico su situacion a empeora y el a wordo transporta pa Jackson Memorial Hospital na Miami.
Na Miami poco poco Betico a recupera di e herida di bala y dia 26 di augustus el a bolbe su isla natal, sano y salvo y pa continua cu su lucha pa Aruba.
Esaki ta momento cu sanger a bolbe wordo derama, pasobra ya na 1977 ora cu tiro a cay, a alcansa e jeep di Betico y a perfora pia di algun famia. Na 1983 ta Betico mes a drama sanger pe lucha y ni esaki a stop e di bolbe bek, y sigui cu e lucha.
