Palm Beach – Diasabra anochi varios unidad policial y tambe ambulance a bay den un caya den Palm Beach, unda cu un persona lo a yega cu un herida na su garganta.
Na yegada di patruya nan a constata cu ta trata di hoben di 16aña, cu lo a wordo hinca un caminda den su garganta.
Polisnan a logra saca algun informacion di e mucha, cu a papia cu e incidente lo a tuma luga altura di Palm Beach Plaza.
E la bisa tambe cu aparentemente lo tawata trata di un grupo grandi di hobennan di Dakota.
Despues cu e la wordo hinca asina mes e la logra crusa caminda y yega den un caya poco mas panort di Wendy’s Palm Beach, unda cu polis y Paramediconan a bin haye.
E area a wordo cera cu lint geel, pa asina investigacion cuminsa.
Despues di a stabilisa e hoben por a mira cu e ambulance a sali cu urgencia direccion Hospitaal. No ta conoci e gravedad di e hinca.
7 hoben deteni
Polis a logra pone man ariba 7 hoben, esakinan a wordo deteni ariba tereno di dos hotel, tur a wordo treci warda di Shaba.
Muy probablemente esun cu a propina e hinca lo por ta entre e grupo treci warda. Nos no por bisa si e grupo aki tur ta menor di edad si of no.
Un apelacion ta bay si na mayornan, vakantie ta den porta y lo ta bon pabo sa cu kende bo yiu ta sali ariba weekend. Unda e ta bay y ki ora e mester ta na cas bek(si e ta menor).
Comunicacion entre mayornan cu yiu ta sumamente importante, mester tin e confiansa.
