Atrobe e situacion di Trahadornan na Fundacionnan ta den prensa y esaki pa motibo di falta di placa. Manera semper, trahadornan ta e ultimonan pa bini na remarca pa loke ta nan condicion di trabao, esaki cada biaha ta causando problema. Antes como lider sindical di SEPPA semper y te ainda mi punto di salida ta cu e tareanan cu e fundacionnan den sector publico ta eherce ta pa cubri cierto terenonan social, cualnan Gobierno como un bon defensor di pueblo mester eherce den e mihor forma, pero no ta hacie y ta e fundacionnan ta eherce e tareanan aki, cu subsidio di Gobierno. Comotal e trahadornan mester ricibi un trato igual na e ambtenaar. Mi ta menciona aki e cuido optimo pa e babynan y muchanan chikito cu problema den famia, nan tambe mester di un bon cuido y pesey a crea Casa Cuna y Imeldahof, nos hendenan special na SVGA, na Ambiente Feliz y na otro fundacionnan, nos grandinan na SABA, cuido extra-mural di Wit-Gele-Kruis y otro fundacionnan.Como lider sindical mi mester a haci basta cos fastioso den prensa, criticando gobernantenan, directivanan di fundacionnan y hasta yamando accionnan, etc.. Tur cu e intencion pa mehora e situacion di e trahadornan na e fundacionnan
Subsidiale Regeling na 1994 y mehoracion di e condicionnan di Trabao
Finalmente na 1994, nos a yega na un acuerdo cu gobierno e tempo ey cu Prome Ministro Oduber y Ministro Refunjol pa un Subsidiale Regeling pa Fundacionnan, cual ta encera cu e trahadornan ta ricibi un trato igual na e ambtenaar cu excepcion di Penshun y e derecho pa bay Ambtenarenrechter.
Mi ta corda con e tempo ey, e tabata un logro grandi pa e trahadornan di Fundacionnan, tin trahadornan a mira nan salario bira dobbel y nan a cuminsa ricibi vakantie-uitkering y bentahanan cu e ambtenaar tabatin.
Durante e negociacionnan den e decada di 90 di siglo pasa, como vocero di sindicatonan den sector publico, durante negociacionnan cu Gobierno, semper pa mi persona e posicion di trahadornan di e fundacionnan den sector publico tabata presente y tur acuerdo pa e ambtenaar pa loke ta Indexering, Gelijkbedrag, Vakantie-uitkering, ATV-dagen, Bashi-premide, etc., tur mester conta igualmente pa e trahadornan di fundacionnan.
Ta bon pa menciona cu na 1994, SEPPA tabata e unico sindicato negociando cu Gobierno pa mehora e status di trahadornan di Fundacionnan, cu lidernan cu conoce e materia dificil y kendenan semper tabata balente pa defende trahadornan y logra lo maximo.
Eliminacion Subsidiale Regeling.
Na 2015/2016, gobierno di signatura Berde, e tempo ey pa motibo di malmaneho financiero y cu un enorme falta di placa, a tuma e decision pa elimina e Subsidiale Regeling pa Fundacionnan den sector publico. Fundacionnan ta bay ricibi solamente un suma anual cual a ser calcula di ta banda di 80% di e casto total di e Fundacion. Fundacionnan a ricibi e conseho pa bay organisa fundraisings of otro formanan pa yega na placa y purba di mantene nan cabes ariba awa. Un abuso!!
Na momento cu Gobierno a elimina e Subsidiale Regeling pa fundacionnan den sector publico na 2015/16, lidernan sindical cualnan tabata representa e trahadornan na fundacionnan no a para duru pa e derechonan adkeri y mustrando gobierno cu e decision pa elimina e Subsidiale Regeling ta un abuso y incorrecto. Trahadornan no ta culpabel pa e situacion financiero malo.
Awendia nos ta lesa den prensa internacional e expresion “in Cahoots with”, esta den harmonia cu otro of mas extremo ta conspira cu otro.
Parce e tempo ey cu lidernan sindical di SEPPA (brito), di ABV y otronan tabata “in cahoots with” e partido berde y boca cera nan a guli e decision malo di gobierno pa elimina e Subsidiale Regeling.
Awe nos ta biba cu e maldesicion aki, falta di accion na 2015/2016, ta pone cu awe sindicalismo cada bes ta haye obliga di hiba accion contra gobierno.
Awe tambe e situacion ta otro, despues di e acuerdo di 1994, varios sindicato a cuminsa cu lucha fuerte pa busca representacion serca trahadornan na Fundacionnan. Hopi trahador tambe cu un falta di memoria, lubidando kico a pasa y ken a logra y errornan ta ser cometi. Hasta cu poco tempo pasa mi a wak un CAO na Imsan den cual Trahadornan a perde nan ATV-dagen, pues derechonan adkeri ta ser perdi.
Politiconan sin Memoria y eliminacion di Subsidiale Regling ta causando problema.
Den prensa nos por a wak posicion di integrante y ex-integrante di e partido berde, partido cu a elimina e Subsidiale Regeling, awe nan ta grita pago di Vakantie-regeling, paga di tal y mas.
Parce hendenan sin memoria, shonnan no ta bosonan mes a elimina e Subsidiale Regeling!!! despues di boso malmaneho financiero. Consecuencia ta, cu e fundacionnan awor cu problemanan financiero y nos tur sa cu e posicion di trahador, mayoria di biaha serca dunadornan di trabao, ta keda ultimo pa ser regla.
Consecuencia di e eliminacion di e Subsidiale Regeling ta tambe cu na Fundacionnan, hopi trahadornan cu e ultimo añanan a ser tuma den servicio, no ta goza di e mesun areglonan cu su coleganan, cu mas aña di servicio, si ta ricibi manera ATV-dagen, Vakantie-uitkering y mas.
Esaki ta un discriminacion grandi bao di trahadornan na un fundacion y na mi opinion ilegal, ya cu e acuerdonan di añanan 90 di siglo pasa ta conta pa tur ambtenaar y tur trahadornan di fundacionnan.
Aki atrobe e lidernan sindical y e politiconan “sin memoria” ta fayando y alaves culpabel.
Solucion pa e problemanan di fundacionnan
Primeramente mester trece bek e Subsidiale Regeling na tur fundacionnan cu ta cay bao di Gobierno.
Mester reconoce cu tur trahador ta experto ariba nan tereno y nan mester di careranan bon defini, aserca cu e condicionnan secundario igual na e ambtenaarnan.
Na SABA, e Fundacion mas grandi, e problemanan tambe ta hopi grandi.
Pa cuminsa ta elimina e grito bashi “Elimina e verpleeghuiszorg”, cual ta rediculo y laga biento bay cu ne.
Sigur pa loke ta gobierno falta di un maneho bon defini, cual mester tene cuenta cu e subimento di edad di nos poblacion y tambe na mundo completo.
Hunto cu esaki nos tin un cuido medico acceptabel y cu hopi hende di e tercera edad ta yega edadnan halto pero hunto cu esaki, cu malesanan cu mester di cuido permanente.
Cu e consecuencia cu ta e trahadornan di Casnan di Anciano tin di lucha pa alivia y/o soluciona e problemanan di nos grandinan.
Na SABA tin patientenan cu, laga nos bisa tin mester di 100% pa loke ta cuido, otronan cu 75%, mas otronan cu 50% of cu cualkier otro percentahe.
Esaki ta pa specialistanan defini y na final di cuenta ta apunta e cantidad di trahadornan pa e cuido, uzando varios modelonan. Ta e Trahadornan aki nos mester duna e mihor trato cu bon salarionan y bon condicionnan di trabao.
