Den un desaroyo nobo, e autoridadnan migratorio di Venezuela a “deporta”/extradita e comerciante Colombiano, Alex Saab pa Merca. Saab ta conoci pa tabata e “man drechi” y e “saco di placa” di e ex-presidente Nicolas Maduro. E decision aki ta marca un cambio radical den e politica di Caracas, specialmente despues di e caida di Maduro mas trempan e aña aki.
Un caida structural
Alex Saab, kende a yega di fungi como Minister di Industria di e regimen Chavista, a ser deteni pa autoridadnan Venezolano for di luna di februari ultimo, caminda e tabata sera den e prizon conoci como El Helicoide.
Despues cu e ex-presidente Nicolas Maduro a ser captura pa forsa militar Mericano na januari ultimo, e president interino di Venezuela, Delcy Rodríguez, a aleha su mes for di e circulo di Saab. Delcy a kit’e for di su puesto den Gabinete y a distitui’e di su funcion como enlace pa inversionistanan estranhero.
Di “Heroe” pa criminal
E decision aki ta un golpi duro pa e movemento Chavista. Na aña 2023, President Joe Biden a duna Saab clemencia como parti di un intercambio di prizonero entre Washington y Caracas, caminda a cambia Saab pa prizoneronan Mericano. Na e momento ey, e regimen di Maduro a ricibi Saab como un heroe nacional y como un “diplomatico” cu a lucha contra e sancionnan.
Sinembargo, e panorama politico a cambia completamente:
E rason oficial: E servicio di migracion di Venezuela (SAIME) a informa cu a “deporta” Saab a base di e investigacionnan penal cu tin contra dje na Merca.
Polemica riba Nacionalidad: Pa por a evita e prohibicion constitucional cu Venezuela tin pa extradita su propio ciudadanonan, e autoridadnan a catalog’e oficialmente como “ciudadano Colombiano”, ignorando e pasaport y nacionalidad Venezolano cu e regimen anterior a dun’e.
Kico ta spera Saab na Merca?
Alex Saab awor tin cu enfrenta husticia den corte federal na Miami, Florida. E ta ser acusa di labamento di placa (money laundering) y corupcion masivo relaciona cu contractnan infla di e programa di cuminda di Gobierno (CLAP) y proyectonan di casnan social cu nunca a ser construi.
Segun analistanan y documentonan di corte bieu, Saab ya a yega di colabora den secreto cu e DEA (Drug Enforcement Administration) den pasado. Awor, cu Nicolas Maduro mes sperando huicio na Manhattan pa acusacionnan di narcotrafico, e fiscalnan Mericano ta mira Saab como un testigo clave cu por revela tur e medionan financiero ilicito y e ruta di placa di e lidernan di e antiguo regimen Venezolano.
