Un biaha mas e talento deportivo di Aruba ta saca cara den exterior. Dia 18 di juni 2026 ultimo, Sr. Victoriano Orman, miho conoci den mundo di deporte como “Chipo”, a sali rumbo pa Cali, Colombia. E biahe aki tin como meta pa reforsa e ekipo di softball Halcones Pereira di Cali, caminda el a bisti e uniform number #29 pa hunga tercera base den e di cuater Torneo Internacional di Softball Plus 60, un evento di gran nivel cu ta tuma luga di 23 di juli pa 28 di juli 2026.
Durante e campeonato aki, Halcones Pereira lo hunga varios wega contra varios ekipo fuerte, den un torneo caminda Aruba tambe lo wordo representa p’e ekiponan Astros y Surprise. Ekipo di Halcones Pereira tin como meta keda den e prome lugarnan, caminda ta spera cu Sr. Victoriano Orman lo sobresali na tercera base pa yuda su ekipo titula campeon. El a biaha cu hopi anticipacion pa asina train, duna su maximo esfuerso cu su asistencia y demostra su gran nivel sin comete eror riba veld.
“Chipo” ta un figura ampliamente conoci y respeta den comunidad, destacando como basebolista, softbolista y futbolista. Su carera a cuminsa for di un edad trempan; cu apenas 11 aña di edad el a cuminsa hunga baseball, pa despues duna paso na softbol y futbol. Na varios ocasion el a yega di representa Aruba, demostrando su gran versatilidad ya cu e por domina tur posicion riba veld. Ademas, el a comparti su conocemento como coach di ekiponan di baseball den categorianan di Little, Junior y Senior League. Na aña 2020, Sr. Orman a bay biba na Cali, Colombia, pero na luna di juli di aña pasa el a bin residencia bek na su pais Aruba, caminda actualmente e ta forma parti di e ekipo di Softball Sluggers 60+.
E reto aki tin un nificacion masha special, ya cu e aña aki ta 50 aña cu Sr. Victoriano Orman ta celebra como deportista. Pa celebra e bunita aniversario aki, el a ricibi su pasashi regalo for di su yiu muher mayor, kende semper a apoy’e den su carera.
Su famia ta sinti un orguyo enorme p’e gran paso aki y ta dese’e tur clase di exito den e torneo. E ta ricibi palabranan di animo di parti di su 6 yiunan: Jaella y Biorn Obispa-Orman, Joelys Orman y Jerry Martina, Leandro Orman y Sharlin Wever, Harvick Orman, Rayvick Orman, y Vie-Hayley Orman.
Tambe e ta ricibi bendicion di su nieto y nietanan: Rayjen Donato y Sherilyn Oduber, Jayron Martina, Jerriane Martina, Jaelly Murray, Jeremiah Martina, Leandray Gomes, Jernilius Martina, Liah Orman, y Jaylan Obispa; y de su unico bisanieta, Ray-lyn Donato, kendenan ta hopi orguyoso di dje. Exito na Chipo Orman den e gran torneo aki na Colombia!
