Escandalo! Tin hopi victima di hacker na Aruba
Red Colombiano operando na Aruba ta gaña namora via facebook y whatsapp y ta pidi video
Tin un escandalo tumando lugar na Aruba. Hopi Arubiano a cay den trampa di un grupo di Hacker Colombiano cu ta operando na Aruba. E trampa di e hacker ta basila su victima preteniendo di ta namora y asina ta pidi pa haci live call, pa mustra curpa y of haci actonan sexual via video call. Mientras cu e victimanan ta kere cu ta un relacion serio, e hacker ta bezig ta grabando nan na otro banda.
Una ves cu e hacker tin e video graba, un dia despues e ta cuminza asercabo, puntrando conta, y despues e ta manda e video pa e victima.
E momento ey e ta cuminza e extorsion y chantage y ta exigi placa y tambe ta duna deadline, y si e victima no cumpli cu manda e placa Colombia, e lo bay manda e video viral riba whatsapp.
Varios te hombernan cu a cay facilmente den e trampa, keriendo cu ta un mamasita a namora di nan via internet, y ta cuminza complace e hacker cu videonan desnudo, drumi riba cama, mientras cu otro banda e hacker ta graba nan.
Un persona a informa Solo di Pueblo, cu e hacker cu number di telefon local, ta pidi su victima pa manda placa via Union Caribe pa Colombia.
Den un caso el’a pidi e suma di Afl. 1250.00 y cu mester wordo deposita na Union Caribe pa Colombia prome cu tal hora.
Informacion cu Solo di Pueblo tin, ta bisa cu tin varios victima a cay den e ultimo simannan pa e scam aki. Tin varios hende homber y hende muher cu ta man na cabes, cu nan video sunu, ta den man di hacker.
Pues e hacker ta aserca su victima via facebook, despues ta pidi number di telefon y via un whatsapp cu number local ta sigui e plan pa extorsiona hende cu e video.
Solo di Pueblo ta manda un alerta y ta pidi tur tur hende, pa no accepta hende desconoci riba Facebook y tampoco cuminza conversacion cu hendenan for di Colombia of Venezuela.
Autoridad local ya caba ta na altura di e practica aki y parce cu tur warda di polis ta druk druk, unda cada pasa tanto hora, ta yega mas victima, unda hacker tin nan video totalmente suno, ta haciendo cosnan personal.
Nos a bin compronde tambe cu tin hopi Arubiano cu tin miedo di bay polis! Pero nos ta urgi tur cu ta den e problema aki, pa no tene miedo y acudi na polis.
