E logro aki lo habri wowo di compania multinacional y por bira un otro pilar di economia
Aruba a wordo reconoci pa e Organisashon pa Cooperacion y Desaroyo Economico (OCDE) dor di wordo inclui den e lista blanco di cooperacion fiscal di Union Europeo. E reconosimento aki no solamente ta resalta e compromiso di Aruba cu e standarnan internacional di transparensia fiscal, pero tambe ta hunga un papel importante pa e pais den benefisionan importante pa futuro.
Un di e principal benefisionan ta e fortificasion di e reputacion internacional di Aruba como un destinacion favorabel pa inversion y pa hasi negoshi. Wordo poni den e lista blanco ta mustra cu Aruba ta gana credibilidad y confiansa entre inversionistanan internacional, loke por atrae mas inversion directo for di exterior.
Ademas, e status di lista blanco ta facilita e relacionnan comercial y finansciero di Aruba cu otro paisnan di Union Europeo y mas leu. Dor di cumpli cu e standarnan di transparencia fiscal, Aruba por goza di un integracion economico internacional mas grandi y haña acceso na un variedad di oportunidatnan comercial y financiero.
Un otro beneficio importante ta e reduccion di e riesgonan pa evacion fiscal (sconde pa belasting) y labamento di placa. Dor di mantene un standard halto di transparencia y cooperacion fiscal, Aruba por proteha su sistema financiero y reforsa e integridad di su sector economico.
Pa resumi, e reconosimento di Aruba den e lista blanco di cooperacion fiscal cu Union Europeo ta representa un logro significante cu no solamente ta impulsa e desaroyo economico di e pais, pero tambe ta reforsa su posicion como un actor responsabel y confiabel den e comunidad internacional.
Nos no por keda sin felicita Minister di Finansas Xiomara Maduro cu a traha incansablemente pa reorganisa leynan, maneho y proceduranan den nos pais pa yega na e punto aki.
Den pasado varios Minister di Finansas di AVP no a logra drecha e nomber di Aruba, manera ex minister Mike de Meza, Juan David Irausquin y Angel Bermudez. Nan a sinta pa 8 aña largo unda no a traha riba esaki, unda consequentemente labamento di placa por a tuma lugar y afectando e credibilidad y reputacion di Aruba.
E condicion actual por atrae entre otro banconan multinacional pa pone cierto di nan departamento opera na Aruba of nan data center. Tambe data center di companianan technologico manera Google, Apple, Amazon. Por pensa riba call center di varios companianan multinacional. Sector di Energia tambe ta habri porta pa inversion nobo como tambe sector di Realestate of proyectonan turistico.
