Ministerio Publico a finalisa e caso penal contra M.E. de Meza y su esposa.
Ambos sospechoso a acepta y a paga un transaccion, cu ta evita cu nan ta wordo persigui penalmente.
Cu e pago di e transaccion, e caso a keda cla definitivamente.
De Meza y su esposa a wordo sospecha di violacion di articulo 68, prome parafo, apartado a, juncto segundo parafo di Algemene landsverordening belastingen.
Segun Ministerio Publico, entre prome di januari 2009 y 31 di december 2021 nan a presenta varios biaha informacion incorecto y incompleto den nan declaracionnan di belasting riba entrada.
Dia 10 di juni 2026 a tuma lugar e prome Cita cu Fiscal (TOM-zitting) den e caso aki.
Durante e Cita cu Fiscal, Ministerio Publico a ofrece na e sospechosonan -saliendo di e punto di vista cu ta trata di un caso cu por wordo comproba- e posibilidad pa evita persecucion penal mediante pago di un suma di placa.
E sospechosonan no a accepta e oferta na tal momento.
Siguientemente tur dos a wordo cita pa presenta dilanti Corte den Prome Instancia riba 24 di augustus 2026.
Riba peticion di e sospechosonan a tuma lugar un di dos Cita cu Fiscal riba 7 di augustus 2026.
A consecuencia di e Cita cu Fiscal aki, Ministerio Publico a fiha un suma menos grandi como condicion pa evita persecucion penal, tumando na cuenta e circunstancianan specifico di e caso y di e personanan en cuestion.
E sospechoso a accepta e oferta aki y a cumpli cu e pago riba 11 di augustus 2026.
Cu e pago di e transaccion, e caso a ser considera definitivamente conclui y Fiscal a retira tur dos citacion awe.
