Recientemente un investigacion di Nederlanse Redersvereniging a reporta cu ta existi actualmente 16 tankero ruso cu ta nabegando bou di bandera Arubiano. Ta trata di barconan cu ta uza nos bandera pa evita sancion internacional, y cu ta haci uso di bandera falso y documento fraudulento. E practica aki no ta un cos chikito. Uzo di bandera di Aruba pa barconan di otro pais cu Aruba no tin ningun control riba dje ta causa un daño na nos reputacion. Aruba no tin registro maritimo propio, ni tampoco autoridad pa registra e barconan. Pues ningun barco por uza bandera di Aruba. Sinembargo, tin barco cu ta presenta nan mes na mundo manera “di Aruba”. Esaki no ta solamente un manera di engaña, pero ta pone nos pais mes den centro di tension geopolitico cu Rusia y otro paisnan cu ta busca pa evita sancion.
Corsou SI ta tuma accion
Na Corsou tambe a identifica e problema aki. Autoridad Maritimo di Curacao (MAC) a anuncia cu, den colaboracion estrecho cu Hulanda, nan lo tuma accion inmediato contra abuso di bandera di Corsou. Nan ta tuma responsabilidad y ta comunica cla cu partnernan internacional. Esaki merece respet.
Pero e pregunta ta: unda gobierno di Aruba a keda?
Ta varios siman pasa caba fraccion di MEP a manda carta y pidi atencion di Minister di Transporte Wendrick Cicilia riba e problema serio aki. Pero no a bin ningun reaccion di parti di Gobierno. Mas nos keda sin tuma accion, ta mas daño e ta haci nos pais. E riesgo ta cu Aruba lo wordo asocia internacionalmente cu trafico ilegal di petroleo y cu esnan cu kier evita sancionnan. Esaki no ta yuda Aruba mientras cu nos mes ta busca pa fortalece un imagen confiabel y transparente, particularmente ora cu nos ta busca mas cooperacion internacional y desaroyo economico.
MEP “gobernando desde oposicion” a conseha e minister ki paso e mester tuma
1. Mester fiha un posicion cla y publico: Gobierno di Aruba mester ta hopi cla cu e uso di nos bandera pa e barconan aki ta fraudulento y Aruba no tin ningun responsabilidad pa esaki.
2. Colaboracion cu Hulanda y Corsou: Solamente si nos ta actua hunto lo nos por logra efecto internacional y fortalece capacidad di control.
3. Alerta internacional: Aruba mester pidi autoridadnan di puertonan internacional pa vigila e barconan aki mas di cerca, y actua ora mester.
4. Plan di accion: Tin cu bin cu un maneho cla pa señala y combati abuso di nos bandera den futuro.
Keda sin actua no ta un opcion
“Esaki no ta un situacion cu Aruba por ignora. Como miembro di Parlamento a bolbe pidi splicacion y accion di minister di Transporte. Nos sa cu nan no ta gusta cu nos ta pone presion for di oposicion, pero nos tin responsabilidad pa proteha nomber di Aruba contra uzo fraudulento. Si nos keda sin haci algo, nos lo wordo mira manera complice den wowo di mundo. Ta ora pa Aruba mustra cu nos bandera no ta na benta, no ta pa abuso, y sigur e no ta pa e barconan ruso buscando pa evita sancionnan.
