Fraccion di MEP a manda preguntanan por escrito na e Minister di Finansas tocante e maneho financiero rond e trabou di limpieza cu ta wordo haci na e bario-nan di Aruba riba orden di e Minister President Mike Eman.

Segun informacion ricibi, Bureau City Inspector, riba orden di e Ministerio di Asuntonan General y di Naturaleza, no ta wordo utiliza solamente pa limpieza di luganan publico, sino tambe pa limpia tereno-nan priva, usando fondonan publico. Esaki ta mustra claramente cu e gastonan ta wordo haci na beneficio di e campaña electoral di AVP, usando placa di pueblo.

Ademas, segun informacion cu e Fraccion a haya, e presupuesto di 2025 pa Bureau City Inspector ya ta completamente gasta, mientras cu e aña di presupuesto 2025 ainda tin tres luna pa bai. E fraccion di MEP ta considera esaki sumamente preocupante, y ta pidi transparencia, control y responsabilidat inmediato di parti di gobierno. Ta asina e problemanan di mal maneho a cuminsa durante e prome gobierno di Mike Eman y a termina den un curatela financiero y welga di hamber na aña 2013.

Den e preguntanan na e Minister di Finansas, e fraccion ta pidi pa tin investigacion y control efectivo, y kier sa si e gastonan aki ta den conformidad cu e Ley di Contabilidad, y ki mecanismo di control ta existi pa preveni uso incorreto di fondonan publico.

“Bon maneho financiero ta un fundamento di bon gobierno. Parlamento y pueblo tin derecho pa sa con e placa di comunidad ta wordo usa,” segun e fraccion di MEP.

E fraccion ta spera cu e Minister di Finansas contesta e preguntanan den dos siman, pa Parlamento por cumpli cu su rol di vigila uso legitimo y integro di fondonan publico.