Laga nos para keto un rato y realisa, cu no ta serca nos so pero ta henter mundo mucha y hubentud ta bao di atake, pone e cos aki den man di Dios, pasobra tin pais caminda mucha bao di edad ta cana bebi, droga y cu malesa di caya, e mucha no tin 12 anja ainda y ya e ta den cosnan cu por caba cu su bida .
Nos no mesyer lubida cu tur mayor tin un mandato di Dios pa cuida y guia nan yuinan, pero no ta tur ta tene cuenta cu esaki, hopi ta laga cos bay for di man, hopi no ta tuma nan responsabilidad na serio, hopi ta manipula, y tin hopi ta masha iresponsabel.
Bijbel ta bisa den Proverbionan 29:15: Bara y reprendemento ta duna sabiduria, ma un yiu laga pa su cuenta, ta pone su mama na berguensa.
No tin excuus pa cria mucha mal cria, pasobra ora un mucha wordo lanta for di orden, henter su bida lo ta for di orden, pasobra ora un fundeshi ta zwak, henter e edificio ta debil.
Un mucha no por wordo lanta den palabra malo y violencia, y no por spera algo bon di dje, si mayornan no ta duna bon ehempel di amor y respet , pa e mucha tin algo positivo pa tene lanta na dje.
Si mayor no por guia un mucha den caminda di Dios, for di tempran, nan mes lo mira ora e bira grandi, con nan tin cu lucha cune pa vense tentacionan cu ta bini riba su bida.
Mescos cu awendia no ta un luho cu un mucha tin su mes telefon, awel no por ta un luho pa guia un mucha, si un hoben den caminda di Dios, pasobra e mucha mester sa e berdad, pa asina e por wordo libra di trampa di e enemigo.
Hopi biaha divorcio ta goso pa hende grandi, especialmente ora nan ta lubida locual nan a primiti dilanti di Dios, y nan kier nan libertad pa sigi cu nan bagamunderia, pero nan ta lubida riba e mucha, riba e hoben, cu mester di guia di tur dos y e locual ta mas importante bibando bao di mesun dak.
Separacion di mayor ta un parti di confusion, y trauma pa tur mucha y tur hoben.
Ni maske cuanto curso bini cune, ni maske cuanto psycologo drenta den den e asunto, ni un di nan no por reemplasa e amor di mama y tata, y no lubida e guia y educacion constante cu mayor mester duna.
Ta ken por sinti mas pa un mucha cu su mama a pone na mundo, y ken por stima un mucha mas cu su tata cu a trahe, laga nos ta serio.
Instrui un mucha den e caminda cu e mester cana, y hasta ora e mester bira bieu, e lo no aparta su mes for di dje.( Proverbionan 22:6).
Locura ta mara den curason di un mucha, bara di coreccion lo aleha esaki for di dje.( Proverbionan 22:15).
Disiplina bo yiu, miemtras cu tin speransa, y no desea su morto. ( Proverbionan 19:18).
Den Romanonan 1:28-30 ta para scirbi kico lo pasa cu hende cu no ta reconoce Dios, pesey ta deber di tur mayor pa haci esfuerso pa lanta na yiu den e palabra di Dios, pasobra si no ta asina, nos ta cargando awa hiba laman.
Tur hende a wordo spierta y tur por lesa locual ta para scirbi den 2 Timoteo 3:1-5 y awor nos ta mira esey ta sosode diariamente.
Salbacion di nos yuinan ta importante.
Sinceramente, Pastor Marcel Balootje
