Ministerio di Salubridad y Asuntonan Social a organisa un sesion informativo y interactivo pa introduci ayudo financiero pa muchanan cu limitacion, cu ta destina pa muchanan cu mester di cuido intensivo. E sesion tabata parti di e esfuerso pa fortifica e sector social pa famianan vulnerabel na Aruba.
Bou di e revision di e sistema di seguridad social den cuadro di e Landspakket, Gobierno ta trahando riba un modelo mas humano, moderno y husto.
E ayudo financiero pa muchanan cu limitacion ta un paso clave pa brinda dignidad, stabilidad y sosten na famianan cu tin yiu cu mester di cuido intensivo.
E medida aki ta basa riba e realidad cu cuido intensivo ta crea situacionnan no comun pa un famia, cu merece reconocemento, sosten y oportunidad igual.
Na aña 2021, Parlamentarionan Melvin Wyatt-Ras y Mike Eman – awe Minister di Salubridad y Asuntonan Social y Minister President– a propone e introduccion di un ayudo financiero pa muchanan cu limitacion na Aruba. Esaki a forma e base legal pa e ayudo aki. E ley nobo ta crea seguridad y derechonan claro pa famianan cu ta depende di cuido continuo.
E ayudo financiero ta destina pa muchanan te cu 18 aña, inscribi na Censo, cu limitacion fisico, mental, psicologico of di comportamento, cu tin mester di cuido intensivo.
E ayudo ta un sosten financiero pa e mayor/dunado di cuido y por wordo uza pa cuido adicional, aparato di cuido, transporte of ahustacion na cas (rampa, gehandicapten wc, etc.).
Ministerio di Salubridad y Asuntonan Social ta reafirma su compromiso pa sigui desaroya un sistema social mas fuerte, humano y inclusivo cu ta brinda sosten real na famianan cu tin yiu cu necesidad di cuido intensivo.
Nos ta compromete pa sigui traha pa un pais cu ta proteha y sostene nos famianan, y cu garantisa oportunidad igual pa tur mucha, sin excepcion.
